Үндістан Пәкістанмен соғыс жағдайы шиеленіскен соң өз зымырандарын сынақтан өткізді

Фото: Bloomberg.сom

Үндістан Пәкістанмен соғыс жағдайы шиеленіскеннен кейін қашықтағы нысандарды дәл соққы жасау қабілетін көрсетіп, зымыран сынақтарын өткізгенін мәлімдеді. Бұл туралы Stan.kz ақпарат агенттігі Bloomberg порталына сілтеме жасап хабарлайды.

"Үндістан әскери-теңіз күштерінің кемелері бірнеше қарсы кемелік зымырандарды сәтті ұшырды. Бұл платформалардың, жүйелердің және экипаждардың қашықтықтағы дәл шабуылдарды орындауға дайын екенін қайта тексеру және көрсету мақсатында жасалды", – деп жазды әскери-теңіз күштері X платформасында. 

Қолданылған зымыран түрлері туралы нақты ақпарат берілмеді.

Оңтүстік Азиядағы екі ядролық держава арасындағы қарым-қатынас 22 сәуір күні Джамму және Кашмир аймағында болған шабуылдан кейін нашарлады. Туристер арасында танымал бұл аймақтағы оқиғадан 26 адам қаза тапқан еді. Нью-Дели бұл шабуылға Пәкістанның қатысы бар деп айыптап, Исламабадқа қарсы жазалау шараларын енгізді. 

Соның ішінде дипломатиялық қатынастар деңгейін төмендету және су ресурстарын бірлесіп пайдалану туралы маңызды келісімді тоқтату бар.

Пәкістан өзіне тағылған айыптарды жоққа шығарып, жауап ретінде үнді дипломаттарын елден шығарып жіберді. Үндістандықтар басқаратын әуе компаниялары үшін әуе кеңістігін жапты және екі ел арасындағы сауданы тоқтатты. Мемлекеттер әдетте зымыран сынақтарын қарсыластарына белгі беру және өздерінің әскери мүмкіндіктерін көрсету мақсатында өткізеді.

27 сәуірде Үндістан премьер-министрі Нарендра Моди өзінің ай сайынғы радиоүндеуінде туристердің өліміне кінәлілердің жазаланатынын тағы да растады.

"Тағы да қайтыс болғандардың отбасыларына әділеттіліктің орнайтынына сендіремін", – деді Моди.

Солтүстік Корея алғаш рет Ресейге әскер жібергенін растады

Иран портында жойқын жарылыс болып, 516 адам зардап шекті

Еске салайық, бұған дейін Үндістан мен Пәкістан шекарасында атыс болғанын жазған едік. Пәкістанның қарулы күштері Бақылау сызығын бойлай оқ жаудырды, бұған Үндістан әскерилері жауап қатты. Ал Бандипорда лаңкестер қауіпсіздік күштеріне оқ жаудырғаннан кейін қақтығыс басталды.