UFC шебері Шавкат Рахмонов Ресей туының астында өнер көрсететіні туралы ақпарат тарады
Қазақстандық жекпе-жек шебері Шавкат Рахмонов күтпеген жерден ресейлік спортшылардың тізімінде пайда болды. Бұл туралы Stan.kz ақпарат агенттігі хабарлайды.
Фото: Шавкат Рахмоновтың желідегі парақшасынан
Танымал ММА сарапшысы Ксавье Лафламм UFC басшысы Дана Уайтқа ресейлік спортшылар мен америкалықтар арасында супертурнир ұйымдастыруды ұсынды.
Ұсынылған жекпе-жек кешінің құрамында жеңілмеген қазақстандық жартылай орта салмақтағы Шавкат Рахмонов та бар, бірақ оны Ресей туының астына қойған. Сонымен қатар Лафламм турнирдің өтетін орнын және нөмірін де белгілеген.
"UFC 318: Филадельфияда АҚШ Ресейге қарсы бақ сынайды:
- Дастин Порье – Ислам Махачев;
- Джамахал Хилл – Магомед Анкалаев;
- Колби Ковингтон – Шавкат Рахмонов;
- Шон О’Мэлли – Умар Нурмагомедов;
- Деррик Льюис – Сергей Павлович;
- Майкл Чендлер – Арман Царукян;
- Кевин Холланд – Абубакар Нурмагомедов;
- Бо Никал – Икрам Алискеров", – деп жазды америкалық сарапшы желідегі парақшасында.
Еске салайық, бұған дейін UFC-дің жартылай орта салмақтағы чемпионы Белал Мұхаммад титулдық жекпе-жекке келесі үміткер ретінде қазақстандық жауынгер Шавкат Рахмоновты атады. BelieveYouMePodcast подкастында Мұхаммад Леон Эдвардстың жақын арада реванш алу мүмкіндігі жоқ екенін айтты. Осылайша, Шавкат Рахмонов UFC титулдық жекпе-жегіне бір қадам жақындап, Қазақстаннан шыққан алғашқы UFC чемпионы атануға мүмкіндік алуы мүмкін.
