Соңғы жаңалықтар
Соңғы жаңалықтар

Түркияда туристтік компанияға тиесілі автобус аударылып, екі адам қаза тауып, 21 адам жараланды

Түркия жолаушылар автобусы апатқа ұшырадыФото: Milliyet 

Түркияның Афьон-Карахисар қаласында туристтер мінген автобус аударылып, жол жиегіне құлап кетті. Нәтижесінде екі адам қаза тауып, 21 адам жараланған. Бұл туралы Stan.kz ақпарат агенттігі Milliyet порталына сілтеме жасап хабарлайды. 

Деректерге сүйенсек, автобус Elazığ Murat Turizm туристік компаниясына тиесілі болған. Ол Динар ауданындағы тас жолмен келе жатқанда, қатты жаңбыр салдарынан жүргізуші рөлді басқара алмай қалған. Сөйтіп автобус жолдан шығып, аударылып түскен.

Жолаушылардың бірі Исмаил Хаккы Гюнгор әпкесіне бару үшін жолға шыққанын айтып, былай деді:

"Жаңбыр мен күрт тежеудің әсерінен автобус тайып кетіп, аударылды. Біз бірден 112 нөміріне хабарласып, жараланғандарды шығара бастадық".

 



Апат салдарынан 41 және 61 жастағы екі жолаушы қаза болды. Тағы 21 адам жарақат алып, Афьон-Карахисар қаласындағы ауруханаларға жеткізілді.

STAN.KZ
Жексенбі, 30 Қараша, 2025 18:24