"Түркі халықтарын біріктіреді": Башқұрттың Homay әні бір күнде хитке айналып, қазақстандықтардың жүрегін жаулады
Желіде бірнеше күн бұрын Ay Yola музыкалық жобасының Homay композициясы тарады. Ән башқұрт тілінде айтылған. Ол бір күнде хитке айналып, қазақстандықтар арасында кеңінен танылфп жатыр. Stan.kz ақпарат агенттігі композицияның не туралы екенін анықтап көрді.
Фото: Видеодан скрин
Ay Yola тобының Homay әні 14 наурызда шықты. Әннің сөзін Диана Кильдина жазған. Осы уақыт ішінде Ay Yola YouTube-арнасындағы бейнебаян 930 мыңнан астам қаралым жинаған. Сондай-ақ әннің бірінші шумағын ғана қамтитын мыңдаған видео ғаламторға тарап кетті.
Homay әнінің түркі халықтарымен байланысы қандай
“Ay Yola-ның Homay әні екі күннен бері ойымнан кетер емес. Оны қайта-қайта тыңдап жүрмін. Әр жолы маңызды нәрсені сезінемін. Оның не екенін нақты түсіндіре алмаймын. Бірақ ол менің генетикалық жадымдағы бір сұраққа жауап бергендей”, “Осы әнді тыңдасам қатты толқимын. Башқұрт немесе татар емеспін, қырғызбын, бірақ бұл ән маған жақынырақ сияқты”, “Homay-ды қайталап тыңдап отырмын. Ән арқылы терең тарихымызды еске түсіремін. Ата-бабаларымыз басынан өткерген кезеңдерді көз алдыма елестетемін”, “Башқұрттардың Ay Yola тобы жазған Homay әні желілерде кеңінен тарап жатыр. Бұл атау башқұрттардың "Орал-Батыр" эпосынан шыққан мифтік Хомай құсына қатысты. Түркі халықтарының мифологиясында Хомай құсы ("Хумо") Ұмай тәңірімен байланыстырылған сәттілік пен бақыт символы. Енді бұл трек түркі халықтарының бәрінің плейлистінде бар", – деп жазды желі қолданушылары.
Топ мүшелері қазақстандықтардың қолдауына тәнті болып, әлеуметтік желі қолданушыларына алғысын білдірді.
"Қазақстан, қолдауларыңызға рақмет! Бұл бейнебаянды сіздер үшін арнайы түсірдік", – деп жазды топ мүшелері.
Осы орайда әннің қазақша аудармасын жаза кетсек:
Тамырым сұрайды,
Жаным мен қаным сұрайды,
Ежелгі тарихи жадым сұрайды,
Хумай деген кім өзі?
Анасы күн нұры
Тіршілік суына шомылдырған
Әкесі – Самрау
Мейірімге баулыған
Әннің бүкіл түркі халықтарына қатысы бар. Композиция қазақ, өзбек, әзірбайжан, қырғыз, қарақалпақ ұлттарын дәріптейді.
"Башқұрт "Орал-батыр" және "Ақбозат" дастандарында Хумай аққу қыз, аспан әлемінің қызы – құстардың патшасы Самрау және аспан сұлуы Күн ретінде көрінеді", – деп жазылған орысша Википедияда.
Басқа түркі халықтарында да осындай мифтік сипат бар. Біріншіден, ортаазиялықтар, оның ішінде қазақтар арасында. Ал Өзбекстанда башқұрт Хумайының аналогы Хума құсы елтаңбаға салынған. Қарапайым тілмен айтқанда, Хумай – түркілердің бақыт құсы. Сондықтан бұл ән түркі халықтарының жүрегіне жол тартты.
Ay Yola жобасы туралы не белгілі
Homay Ay Yola жобасының бірінші әні емес. Ақпан айында Уфа музыканттары "Батыр" трегін шығарды. Жобаның ресми YouTube-арнасында ол 32 мың қаралым жинады.
Ay Yola – жаңа жоба. Оның Вконтакте-дегі парақшасы 2025 жылдың қаңтарында тіркелген.
Ay Yola "Жайық-батыр" эпопеясынан туындаған музыкалық жоба. Олар ата-баба дәстүрін заманауи музыкалық стильдермен үйлестіріп, көне оқиғаларды баяндап шоу жасайды. Жоба әр аңызды жаңа форматта ұсынады.
Фото: gala.evening-kazan
Ay Yola башқұрт супертобы деп атауға болады. Өйткені оның құрамында Башқұртстан мен басқа жерлерде де танымал музыканттар бар.
Ұзын қара шашы өрілген вокалист – Адель Шайхитдинова. Ол 12 жасынан бастап сахнада өнер көрсетіп, ән айтып қана қоймай, гитара мен домбыра тартады.
2014 жылы "Уфа толқыны" байқауында "Жылдың ашылуы" номинациясында Treble Clef сыйлығын алды. Ол әкесі Руслан Шайхитдиновпен бірге музыкалық жобаға қатысады. Бұған дейін әкесі мен қызы Musume электронды жобасын жүргізген. Адель ресейлік TNT арнасындағы "Песни" шоуына қатысып, Тимати музыка стилін жоғары бағалаған. Ал бір жылдан кейін әкесі екеуі орыс тілінде алғашқы альбомын шығарған.
Homay әні желіге тараған кезде Адель әуелі көзге түсіп, көпшіліктің жүрегін жаулады. Мұны желі қолданушылары да жарыса жазып жатыр.
“Шынын айту керек, әнші Адельдің сұлулығы мен вокалының арқасында Homay бізге қатты ұнады”, “Солистің Instagram-ына қарасаңыз, еркіндікті, батыстың өмір салтын қолдайтынын байқауға болады”, “Маған оның еріндерінің қозғалысы ұнайды. Өте әдемі қыз”, “Адельдің сыртқы келбеті мен дауысы әннің кең тарауында маңызды рөл атқарды”, – деп жазды олар.
Ay Yola жобасының үшінші мүшесі – Ринат Рамазанов башқұрт тілінде әндер орындаған "Арғымақ" фольклорлық-рок тобының мүшесі. Бірнеше жыл бұрын бұл топ Алматыда Spirit of Tengri фестивалінде өнер көрсеткен.
