"Тілім ұзын болғанымен, қолым қысқа": Елдос "Колобок" жеке кәсібіне қатысты қиындыққа тап болғанын жеткізді

Танымал блогер Елдос Кәдірханов жеке кәсібіне қатысты қиындыққа тап болғанын айтты. Бұл туралы Stan.kz ақпарат агенттігі хабарлайды. 

Фото: https://www.instagram.com/eldos_kalabok/

Желі жұлдызы блогерлерді халыққа қарсы қойған билік органдарын сынады. 

“Сіз көрген тізімде біз де бармыз. Бізде жеке кәсіп бар. Уақытында салықты төлейміз. Бірақ сонда да келді. Сомада айырмашылық бар екен. Ерлі-зайыптылардың бір-біріне жіберген ақшаларын да есептеп отыр. Енді соны дәлелдеу керек. Блогерлердің тізімін таратып, елдің назарын әдейі аударып қойды. Кейбір адамдар “Сауап болды” деп жатыр. Заң бәріне әсер етеді. Блогерлердің бәрі төменнен жоғарыға қарай көтерілгендер. Енді жеке кәсіпті дамытып, ілгері қарай жүреміз дегенде осындай кедергіге тап болдық”, – деп жазды Елдос. 

• Курс пен марафон ұйымдастырып танылған блогер Елена Блиновская бес жылға бас бостандығынан айырылды

• Блогерлер жарнама жасап ішкен астарына да салық төлейді – Мемлекеттік кірістер комитеті

Сондай-ақ желі белсендісі үш-төрт жыл бұрынғы аударымдарын қайдан, қалай табатынын сұрады. 

“Көп нәрсе айтқым келеді. Тілім ұзын болғанымен, қолым қысқа. Ертең мені “Халық жауы” етіп қояды. Осы күнге дейін билікке қарсы бір фото-видео салмағанмын. Қара тізімде де жоқпын. Ел қатарлы кәсіп жүргізіп, салығын төлеп отырмын. Ең өкініштісі, халық пен блогерді екіге бөліп, жау санады. Үш жыл бұрынғы емес, үш күн бұрынғы чектің қайда қалғанын білмейсің. Ең болмаса, уақытылы салық қағазын жіберіп отырсаңдаршы”, – деп ашуланды желі жұлдызы. 

Еске салайық, желіде салықтан жалтарған отандық блогерлер мен шоу-бизнес өкілдерінің тізімі пайда болған еді.