Теннисші Елена Рыбакина АҚШ-та өткен жарыста жеңімпаз атанды
Қазақстанның бірінші ракеткасы Елена Рыбакина америкалық Тейлор Фрицпен жұптасып, АҚШ-тың Индиан-Уэллс қаласында өткен көрме турнирі – Eisenhower Cup жарысында жеңіске жетті. Бұл туралы Stan.kz ақпарат агенттігі хабарлайды.
Фото: gotennis
Финалдық бәсекеде Рыбакина – Фриц жұбы Мэдисон Киз бен Томми Полды ұтты. Ойын 10:4 есебімен аяқталды.
Бұл жарыста Рыбакина мен Фриц Даниил Медведев пен Аманда Анисимова дуэтін, сондай-ақ Эмма Наварро мен Бен Шелтонды ұтты. Барлық матчтар 10 ұпайға дейінгі тай-брейк форматында өтті.
Турнирдің жүлде қоры 200 мың долларды құрады. Алайда бұл қаражат жеңімпаздардың шешімімен қайырымдылыққа жұмсалады.
Айта кетейік, бұл бәсеке спортшылар үшін Индиан-Уэллсте өтетін WTA 1000 санатындағы турнирге дайындық есебінде болды.
Талқылау