Теңге бағамы құлдырап барады: Айырбастау орындарында доллар 551 теңгеден сатылып жатыр
Фото: afk.kz
Сәрсенбі, 30 шілдеде Қазақстан қор биржасындағы (KASE) сауда барысында доллар бағамы 551 теңгеге дейін көтерілді. Бұл туралы Stan.kz ақпарат агенттігі хабарлайды.
Kurs.kz қызметінің мәліметінше, 30 шілде күні сағат 13:50-дегі жағдай бойынша, айырбастау пункттеріндегі доллардың теңгеге шаққандағы бағамы мынадай:
- Астанадағы ақша айырбастау орындарында бір доллар 542-544 теңге аралығында сатып алынып, 549-551 теңге аралығында сатылып жатыр.
- Алматыдағы ақша айырбастау орындарында сатып алу бағамы 542-546 теңге аралығында белгіленсе, сату бағамы 546-550 теңге аралығында белгіленген.
- Шымкенттегі ақша айырбастау пунктерінде доллар 543-545.5 аралығында сатып алынып, 546-549 теңге аралығында сатылып жатыр.
Мұндай күрт әлсіреу KASE биржасындағы валюталық сауда-саттық аясында орын алып отыр – орташа сараланған бағам бір долларға шаққанда 546,76 теңге (плюс 4,49 теңге) болды. Ал максималды баға 549 теңгеге жетті – соңғы транзакциялар дәл осы бағамен жабылды, айырбастау пункттері өз бағамдарын белгілеген кезде осыған назар аударады.
