Таразда инъекция алған соң қайтыс болған науқастың өліміне қатысты сот үкімі шығарылды

Фото: freepik.com

Тараз қалалық №2 соты процедура бөлмесінде антибиотик инъекциясын алған соң қайтыс болған науқасқа қатысты істі қарады. Бұл туралы Stan.kz ақпарат агенттігі хабарлайды.

Сот мәліметінше, айыпталушы Ц. 2016 жылы Таразда инвазивті процедуралар (көктамыр ішіне және бұлшықет ішіне инъекциялар) үшін процедура бөлмесін ашқан. Алайда, оның мұны істеуге заңды құқығы болмаған.

“2025 жылдың ақпан айында осы процедура бөлмесінде медбике, іс бойынша екінші айыпталушы науқастың бұлшықет ішіне Цефтриаксон препаратын салған. Бұл анафилактикалық шоктың өршуіне әкелген. Салдарынан азамат А. қалалық көпсалалы ауруханада қайтыс болған”, – деп хабарлады сот.

Айыпталушылардың кінәсі жәбірленушінің, куәгерлердің және сарапшылардың айғақтарымен, сараптама қорытындыларымен дәлелденді. Сотталушы Ц. кінәсін мойындамай, соттан өзін ақтауды сұрады. Сотталушы И. кінәсін толық мойындады.

Сот емдеу бөлмесінің иесі мен медбике үшін жеңілдететін мән-жайлар ретінде кәмелетке толмаған балаларының болуын және оң пікірлерді, кінәні мойындауын, қылмыс үшін өкінуін, бұрын сотталмағанын қарастырды. Осылайша сот сотталушы Ц.-ны кінәлі деп танып, оған 2 жыл 6 айға бас бостандығын шектеу жазасын тағайындады. Оған 3 жыл бойы инъекциялық терапия саласында жеке кәсіпкерлікпен айналысуға тыйым салды. Сонымен қатар сот оған 5 миллион теңге моральдық шығын және жәбірленуші тарапқа 1,2 миллион теңге материалдық шығын өндіріп беру туралы шешім шығарды.

Сотталушы И. да кінәлі деп танылды. Сот оны бір жылға бас бостандығын шектеу жазасына кесті. Бірақ Рақымшылық туралы заңның қолданылуына байланысты жазадан босатылды. Сондай-ақ оған үш жылға инъекциялық терапия саласында жұмыс істеуге тыйым салды. Оған 5 миллион теңге моральдық шығын және жарты миллион теңгеден астам материалдық шығын өндіріп беру туралы шешім шығарылды.

Анықтама: Цефтриаксон - үшінші буын цефалоспоринді антибиотик. Ол бактерияларға, соның ішінде төзімді штамдарға қарсы кең ауқымды әсерге ие. Ол инъекцияға арналған ұнтақ түрінде (бұлшықет ішіне немесе көктамыр ішіне) қолжетімді.