Талдықорғанда 22 жастағы жігітті көршісі пышақтап кеткен: Туыстары шыққан үкімге қарсы шықты

Фото: Almaty.tv

Талдықорғанда 22 жастағы Серікжан Өміртайдың өліміне қатысты істі қарап, үкім шығарылды. Сотталған адамға "Аса ауыр дене жарақатын келтіріп, абайсызда өлімге себеп болғаны" үшін 10 жылға бас бостандығынан айыру жазасы тағайындалды. Бұл туралы Stan.kz ақпарат агенттігі Almaty.tv арнасына сілтеме жасап хабарлайды.

Алайда қаза болған жігіттің туыстары бұл үкіммен келіспейді және апелляцияға шағым түсіруді жоспарлап отыр. Олардың айтуынша, бұл қылмыс алдын ала жоспарланған.

Оқиға биыл жазда тұрғын үйлердің бірінің ауласында болған. 26 маусым түні 22 жастағы жігіттің өмірі қыршын қиылды. Куәгерлердің сөзінше, ол достарымен бірге отырған. Сол сәтте көрші кіреберістен бірнеше жас жігіт шығып, бұларға барған. Жай әңгіме бірнеше секундта қызу дауға айналып кеткен. Куәгерлердің айтуынша, олардың бірінің қолында асүй пышағы болған.

"Ол Өміртайды әңгімелесуге шақырды, кім шулағанын сұрамақ болды. Мен артынан жүрдім. Сол кезде олардың арасында төбелес басталды. Жақындап барсам, Өміртай жерге жатып қалған. Футболкасында қан дақтары болды. Пышақты ол алдын ала қалтасына салып қойған екен. Біз мұндай жағдай болады деп ойлаған жоқпыз", – деді куәгер Шыңғыс Мұрат.

Талдықорған қалалық соты сотталушыны "Аса ауыр дене жарақатын келтіріп, абайсызда адамның өліміне себеп болғаны" бойынша кінәлі деп танып, орта қауіпсіздік мекемесінде 10 жылға бас бостандығынан айыру жазасын тағайындады.

"Сот Бейтілеу Даниярды Қылмыстық кодекстің 106-бап, 3-бөлімі бойынша "Аса ауыр дене жарақатын келтіріп, адамның өліміне абайсызда себеп болу" бойынша кінәлі деп таныды. Оған орта қауіпсіздік мекемесінде 10 жылға бас бостандығынан айыру жазасы тағайындалды. Жаза мерзімі үкім заңды күшіне енген сәттен бастап есептеледі", – деді Талдықорған сотының төрағасының міндетін атқарушы Әлібек Әбдіхайев.

Алайда қаза тапқан жігіттің отбасы осындай шешімге қарсы. Туыстары бұл өлімнің кездейсоқ емес екенін, Өміртайдың өмірі алдын ала жоспарланып, қасақана қиянат жасалғанын дәлелдегісі келеді.

Қаза тапқан Серікжан Өміртайдың әкесі сот шешімімен келіспейтінін айтып, істі қасақана адам өлтіру бабымен қайта қарауды талап етті. Оның айтуынша, ұлы Үштөбеден Талдықорғанға жұмыс істеуге келіп, отбасына қаржылай көмектесіп жүрген. Туыстарының сөзінше, күдікті оқиға алдында балконнан "өлтіремін" деп айғайлап, пышақты әдейі алып шыққан. Өміртайдың отбасы кінәлі адам әділ жазасын алуға тиіс деп есептейді.

Қылмыскердің анасы өлім жазасына келісті: 17 жастағы қыздың өлімінен кейін қырғыз халқы көтерілді

Түркістан облысында қалыңдығымен кездесуге барған жігітті қатыгездікпен өлтірген 4 адам сотталды

Еске салайық, бұған дейін Ақтөбеде қазақша күрестен жаттығу кезінде 15 жастағы жасөспірім көз жұмғанынжазған едік. Жарыс кезінде медициналық қызметкер болмағаны белгілі болды. Ата-анасы баласына дер кезінде көмек көрсетілмегенін айтып, ұйымдастырушыларды айыптайды. Полиция іс қозғағанымен, кейін "қылмыс құрамы болмағандықтан" тоқтатты. Жауапты бапкер ғана жұмыстан босатылған.