Су тасқыны қаупі, қатты жел мен тұман: Қазақстанның барлық облыcында дауылды ескерту жарияланды

Фото: freepik.com

30 наурызда Қазақстанның бірқатар өңірінде жауын-шашын түсіп, тұман басып, жел күшейеді. Сонымен бірге қардың еруіне байланысты су басу қаупі сақталады. Бұл туралы Stan.kz ақпарат агенттігі хабарлайды. 

Қазгидромет елдің 17 өңірінде дауылды ескерту жариялады: Атырау, Ақмола, Абай, Павлодар, Қарағанды, Қостанай, Маңғыстау, Ұлытау, Ақтөбе, Алматы, Жамбыл, Шығыс Қазақстан, Қызылорда, Солтүстік Қазақстан, Жетісу, Түркістан және Батыс Қазақстан облыстарында.

Жаңбыр, найзағай және қатты жел

Атырау облысында күндіз батысында, оңтүстігінде және шығысында жаңбыр жауып, найзағай болады. Түнде және таңертең тұман күтіледі. Жел оңтүстік-шығыстан және шығыстан соғады, шығысында екпіні 15–20 м/с-қа жетеді.

Маңғыстау облысында түнде оңтүстігінде, батысында және орталығында жаңбыр мен найзағай, күндіз бүкіл өңірде жауын-шашын болады. Ал солтүстік-шығысында кей жерлерде қатты жаңбыр жауады. Сонымен бірге тұман түсіп, желдің екпіні 15–20 м/с-қа дейін күшейеді. Ақтауда түнде және таңертең тұман болады.

Батыс Қазақстан облысының батысы мен оңтүстігінде күндіз найзағай күтіледі.

Бірнеше өңірде жел күшейеді деп болжанып отыр:

• Ұлытау облысында – 15–18 м/с-қа дейін;
• Ақтөбе облысында – 15–18 м/с-қа дейін;
• Алматы облысында – 18 м/с-қа дейін;
• Жамбыл облысында – 15–20 м/с-қа дейін;
• Жетісу облысында – 15–20 м/с-қа дейін.

Көп өңірді тұман басады

Түнде және таңертең Ақмола, Қостанай, Қарағанды, Шығыс Қазақстан, Павлодар, Солтүстік Қазақстан және Абай облысында тұман болады. Көкшетау, Қостанай, Өскемен, Павлодар, Петропавл және Семей қалаларында тұман салдарынан көріну қашықтығы нашарлайды.

Қардың еруі және су басу қаупі

Абай облысында 29–31 наурыз аралығында қардың қарқынды еруі жалғасады. Ауа температурасы түнде −3°C-тан +2°C-қа дейін, күндіз 10–17°C, оңтүстігінде +22°C-қа дейін көтеріледі. Өзендерде мұздың жүруі, мұз кептелістері және су деңгейінің көтерілуі болжанып отыр, бұл су тасқыны мен су басуға әкелуі мүмкін.

Осындай жағдай Павлодар облысында да байқалады. Күндіз ауа температурасы 15–20°C-қа дейін, түнде 0–5°C шамасында болады, бұл қардың белсенді еруіне әкеліп отыр. Синоптиктер жолдарды су басу және елді мекендер мен тұрғын үйлерді су алу қаупін жоққа шығармайды.

Су деңгейі қауіпті межеге жақындап келеді

Қарағанды облысында өзендерде су деңгейі көтеріліп жатыр. Мәселен, Есіл өзенінің Приишимское кенті маңындағы гидробекетінде су деңгейі 354 см-ге жетті (қауіпті деңгей — 385 см). Ал Талды өзенінде Новостройка аумағында 479 см (қауіпті деңгей — 555 см).

Мамандардың айтуынша, жоғарғы ағыстардан келіп жатқан су есебінен деңгей әлі де көтерілуі мүмкін. Қауіпті межеден асқан жағдайда өзен жайылмаларындағы елді мекендер мен жолдарды су басу қаупі сақталады.

Өрт қаупі және шаңды дауыл

Мына өңірлерді жоғары өрт қаупі төніп тұр:

• Қостанай облысының оңтүстігінде;
• Қызылорда облысының шығысында;
• Жетісу облысының оңтүстігінде;
• Түркістан облысының батысында.

Жамбыл облысында таулы аудандарда тұман күтілсе, солтүстік-шығысында шаңды дауыл болжанып отыр. Синоптиктер тұрғындарға ауа райы жағдайын ескеріп, жолда сақ болуға және өзен маңындағы су деңгейін бақылауға кеңес береді.