Сот әйелін "бөлшектеп өлтіремін" деп қорқытқан ер адамды 15 тәулікке қамауға алды
Ақмола облысы Көкшетау қаласының әкімшілік құқық бұзушылықтар бойынша мамандандырылған соты әйелін “бөлшектеп өлтіремін” деп қорқытқан қазақстандықты 15 тәулікке қамауға алды. Бұл туралы Stan.kz ақпарат агенттігі хабарлайды.
Фото: Видеодан скрин
Облыстық полиция департаментінің мәліметінше, ер адам бөтеннің мүлкін бүлдіргені үшін қамауға алынған.
“3 сәуір күні Көкшетау қаласының әкімшілік соты 34 жастағы құқық бұзушыға басқаның мүлкін қасақана жою немесе бүлдіру үшін 15 тәулікке қамауға алу жазасын тағайындады”, – делінген хабарламада.
Қала полиция басқармасы 115-бабы 1-тармағы (Қорқыту) бойынша Астананың тұрғыны мен оның отбасы мүшелеріне күйеуінен келген қорқытулар бойынша қылмыстық іс қозғады. Бұл іс қазір Көкшетау қаласы полиция басқармасының тергеу бөлімінің бақылауында.
Сондай-ақ құқық бұзушыға қатысты жәбірленуші әйелдің туыстарының тарапынан да шағымдар түсті. Арыздар тексеріліп жатыр.
Бұған дейін ер адамның бұрынғы әйелі мен оның отбасына қоқан-лоқы көрсеткені туралы жазған едік.