"Соққыларға үндемей шыдауды ұсынады": Сарапшы Украиналық БАҚ-тың Қазақстанға қысым көрсетіп жатқанын сынады

Фото: Коллаж Stan.kz

Саяси шолушы Ғазиз Әбішев Каспий құбыр концорциумы нысанына жасалған шабуылға байланысты пікір білдірді. Сарапшы Қазақстан Сыртқы істер министрлігінің Украинаға жолдаған наразылығына қатысты украиналық БАҚ-тың реакциясын сынға алды. Бұл туралы Stan.kz ақпарат агенттігі хабарлайды.

Оның айтуынша, Украиналық БАҚ қазір Украинаға дос болып отырған елдердің санын азайтқысы келіп жатқандай.

“Бұл жолы украин әскерилері қазақстандық мұнайды тасымалдайтын КҚК-ның терминалдарына әдейі соққы жасады. Қазақстан үкіметі бұған сабырлы, ресми түрде наразылық білдірді. Бірақ украиналық медиалар керісінше, Қазақстанға "инфрақұрылымға жасалған шабуылдарды үндемей қабылдаңдар" деген мазмұнда жауап берді. Тіпті Ресеймен экономикалық байланыстарды үзуге шақырғандай ишара жасады.

Айта кету керек, Қазақстан Украинадағы соғысты қолдаған жоқ. Ашық та, жабық та форматта әрдайым атысты тоқтатуға, дипломатиялық жол табуға шақырып келеді. Президент Тоқаев Зеленскиймен үнемі байланыста. Сондай-ақ Ресеймен, АҚШ-пен, Еуропамен және Қытаймен де сөйлесулер жүргізіп, бейбіт шешімге жеткізуге тырысады”, – деп жазды сарапшы.

Әбішев сонымен қатар еліміздің Украинаның территориялық тұтастығын мойындайтынын алға тартты.

“Қазақстан соғысушы тараптардың ешқайсысына әскери көмек берген жоқ және бермейді. Тіпті қақтығысқа барған қазақстандықтарды соттайды. Қазақстан бірнеше рет Батыс санкцияларын бұзбайтынын мәлімдеді. Еуропа мен АҚШ бақылаушылары барлық процестерді көріп отыр.

Осының бәріне қарағанда, картаға көз жүгірткен кез келген адам Қазақстанның қандай қиын әрі күрделі геосаяси аймақта орналасқанын түсінеді. АҚШ пен Еуропа да мұны жақсы түсініп, Астананың тұрақтылықты сақтауға бағытталған икемді саясатын жоғары бағалайды. Бұл саясат елдің қауіпсіздігі мен қарапайым халықтың өмір сапасын қорғауға бағытталған. Нағыз жауапты элита әрдайым бірнеше қадам алға ойлайды, елді қауіптен сақтайды, өз халқын қорғайды. Қазақстан элитасы да осындай өз мемлекетіне тарихи жауапкершілікпен қарайтын топ”, – деп түйіндеді ол. 

Еске салсақ, 29 қарашада Каспий құбыр консорциумының Теңіз терминалына тағы бір шабуыл жасалып, салдарынан сыртқы айлақтық құрылғы ауыр зақымданған болатын. Кейін Қазақстан Сыртқы істер министрлігі жағдайға қатысты ресми мәлімдеме жасады.