"Соққы жасағанымды аңғармадым": Әйелі мен ұлын пышақтап өлтірді деп айыпталған Аманқарағай тұрғыны сотта жауап берді

Фото: Tobolinfo.kz

Былтыр 29 қыркүйекте Әулиекөл ауданына қарасты Аманқарағай ауылында сұмдық оқиға болды. Сол түні 51 жастағы Максим Нечаев әйелі Светлана мен 16 жастағы ұлы Данилді өлтірген. Мәйіттерді күдіктінің қызы тауып алған. Ол болған жайтты ауылдасына хабарлап, кейін полиция шақырылған. Максим Нечаев сот барысында жұбайымен танысқан сәттен бастап, қайғылы түнге дейін егжей-тегжейлі баяндады. Бұл туралы Stan.kz ақпарат агенттігі Tobolinfo.kz-ке сілтеме жасап хабарлайды.

Максим мен Светлана Нечаевтар 30 жыл бірге өмір сүрген. 28 қыркүйекте олардың некеге тұрғанына 30 жыл толған, ал бірнеше сағаттан кейін, 29 қыркүйекке қараған түні, отбасы басшысы әйелі мен ұлын өлтірген.

Айыпталушы олардың қарым-қатынасы достықтан басталып, бірте-бірте махаббатқа ұласқанын еске алды. Алдымен жас отбасы Нечаевтың әкесінің үйінде тұрған, кейін Аманқарағайда өз үйлеріне көшкен. 90-жылдары өмір сүру қиын болғанымен, шаруашылық құрып, еңбек еткен. Айыпталушының әкесі жас отбасына сиыр сатып алып, іс бастауына көмектескен. Уақыт өте келе балалар дүниеге келген.

“Алғашында жұбайыммен қарым-қатынасымыз жақсы болды, бөлісетін ештеңе жоқ еді. Ол жұмыс істемеді, үйде отырды, ал мен кез келген жұмысқа кірісетінмін. Балаларымызға киім-кешек секілді керек-жарақтың бәрі жеткілікті болуы үшін ұзақ уақыт Астанада жұмыс істедім. Бақша, мал, балалардың бәрі соның мойнында болды. Босанғаннан кейін оған ауыр тиді, ұзақ уақыт аяғынан тік тұра алмады, қатты шаршайтын. Сол себепті жұмыс істеуге болмайтын. Балалар кішкентай кезде ұрыспадық, кейін ақша жетіспеушілігіне байланысты жанжалдар басталды”, – деді ол.

Осылайша, бірге тұрғандарына 14–15 жыл өткенде алғаш рет ажырасу мәселесі көтерілген, бірақ олар татуласып, өмірлерін жалғастырған. Ал 2025 жылғы жазында тағы да дағдарыс басталған.

“Біз болашаққа жоспар құрдық, екі бөлмедегі жөндеуді аяқтағымыз келді, материалдарын алып қойғанбыз. Жазғы асүй салуды ойладық. Тамыздың басында жұбайым ағаш кесетін цехқа жұмысқа орналасты. Сол кезден бастап арақатынасымыз шиеленісе түсті”, – деді айыпталушы.

Оның айтуынша, сол цехта Расул есімді ер адам жұмыс істеген, Светлана соған ғашық болып қалған. Әйел сол адамға жақын болу үшін жұмысқа тұрған.

Айыпталушының сөзінше, ол бұрын олардың үйіне сүт пен шие сатып алуға келген. Осындай күндердің бірінен кейін Светлана Расулмен бірге жидекті апарып қайтуға кетіп, бірнеше сағаттан соң ғана оралған. Кейінірек ол күйеуіне сол кезде алғаш рет опасыздық жасағанын мойындаған.

“Мен онымен сөйлесуге тырыстым, бірақ ол опасыздық жайлы сұрақтардан қашқақтады. Көзінен бәрі көрініп тұрды… Кейін ажырасу, мүлікті бөлу туралы нақты әңгімелер басталды. Ол 30 жыл бойы мені сүймегенін, ал оны жақсы көретінін айтты. Күн сайын кешке сонымен кездесетін болды. Көршілер саусағымен шұқшия бастады, сырттан сыбыс көбейді. Маған өте ауыр тиді. Бір жарым апта бойы соңынан еріп, отбасымды сақтап қалуды өтіндім, балалардан да, тіпті ұлымның жаттықтырушысынан да сөйлесуін сұрадым… Ол келіспей, ажырасу керек екенін айтты”, – деді ол.

Әйелін ұзақ уақыт көндіруге тырысқанымен ол да көршілер алдындағы намыстанып ажырасуға келісуге мәжбүр болған. Соған қарамастан, оның сөзінше, 28 қыркүйекте әйелін соңғы рет көндіруге тырысқан. Ол күні Нечаевтар үшін маңызды дата – некелеріне тура 30 жыл толған.

“Таңертең оны құттықтадым, ал ол мені ауыр боқтық сөздермен балағаттады, қуып жіберді. Кейін бір-бірімізге айғайлап сөйлестік”, – деді айыпталушы.

Күні бойы олар сөйлеспеген, тек кешке үйде жолыққан.

“Жұмыстан келгенде жуынғысы келетінін білгендіктен, ұлымнан монша жағуын сұрадым. Әйелім келді, мен онымен сөйлесуге тырыстым. Үй сатып алу үшін маған ақша бөліп беруін өтіндім. Ол “Ештеңе бермеймін, күтпе” деді. Бастапқыда ақша жетпегендіктен, бір үйде тұра тұрамыз деп келіскенбіз”, – деді айыпталушы.

Одан кейін Светлана Расулмен кездесуге кеткен, ал Максим ұйықтауға жатқан. Ол түнгі екілер шамасында оянған. Сол кезде ұлы Данил ұйықтауға дайындалып жатқан, ал Светлана өз бөлмесінде ұйықтап жатқан.

“Ұлым ұйықтап қалған соң, ертең адвокатқа барып, ажырасу мәселесін талқылайтынымды білгендіктен, онымен соңғы рет сөйлесуге бел будым. Бөлмеге барып, қолыма кәді мен пышақ алдым. Ол менің тамақ дайындағанымды жақсы көретін, балалар да жақсы көретін. Асүйге шақырып “қарашы, кәді теріп келдім, қуырып берейін” дегім келді. Ұлымның бөлмесі өту жолында еді, жүріп келе жатып еден сықырлады. Ұлым оянып, қолымдағы пышақты көріп, орнынан атып тұрып “Сен не, ақымақсың ба?” деп айғайлады да “Анашым!” деді. Сол сәтте ол да оянды, ұлым маған ұмтылды. Қалай болғанын білмеймін. Дүрбелең басталды. Ол менің басыма, сосын аяғыма соққы жасады, мен теңселіп кеттім, кәді жерге түсті. Қатты қорқыныш болды. Не болатынын, соңы неге апаратынын түсінбей, оған екі рет бейберекет соққы жасадым, ол құлап, қараңғыдан көрінбей қалды. Сосын желкеме бірдеңе тиді. Әйелімді жұдырықпен ұрдым, шабуылды тойтармақ болдым, ол төсекке құлады да, мен оған үш рет соққы жасадым, не істеп жатқанымды аңғармадым. Қан атқылап кеткенде, қанды көрген соң бөлмеден атып шықтым, қалтырап кеттім. Пышақты тастадым. Әзер дегенде темекі шектім, денем дірілдеп тұрды. Кейін қайта кірдім, ұлым ішпен жатып, басы еденде жатыр, қан көп еді. Әйелімнің бөлмесіне қарадым, ол шалқасынан жатып, қозғалып, бірдеңе айтқысы келді, бірақ мен не болып жатқанын түсінбедім”, – деп баяндады ол.

Одан кейін, айыпталушының айтуынша, ол киініп, арқан алып, асылуға тырысқан, бірақ сәтсіз болған.

“Асылмасам, өзімді пышақтаймын деп ойладым. Пышақты өзіммен ала шықтым, бірақ киініп жатқанда түсіріп алдым”, – деді Нечаев.

Ол үйден шығып, әдеттегідей қақпаны жауып, көз көрген жаққа қарай кетіп қалған. Оның айтуынша, Аманқарағайдан орман арқылы Қазанбасыға дейін дерлік жеткен (арақашықтық шамамен 45 шақырым). Орманда тағы да өз-өзіне қол жұмсамақ болған, бірақ ағаш бұтағы сынып кеткен.

“Орманда отырып, не істеп қойғанымды ойладым. Соңы немен бітетінін түсіндім. Үйге қайтуға шешім қабылдадым. Олар тірі болуы мүмкін деген үміт болды”, – деді Нечаев.

Ол таңғы 6-7 шамасында Аманқарағайға оралған. Осы уақыт ішінде полиция, әскери қызметкерлер секілді оны іздеуі мүмкін адамдарды бірнеше рет көрген, бірақ бәрі жай ғана өтіп кеткен.

Сол аралықта ол ата-анасының зиратына барып, ұзақ отырған, кейін ауыл ішінде тағы біраз жүрген. 29 қыркүйек кешке қарай, қараңғы түскенде, түнде қылмыс жасаған үйіне қайта оралған.

“Үйге артқы жағынан кірдім. Аулада ит байлаулы тұрды. Демек, полиция келіп кеткен деп ойладым. Үйде мәйіттер жоқ екен. Өз бөлмеме барып, қызанақ жедім, темекі іздедім. Кейін кіреберіс есікті іштен кілттеп, көрпелерді алып, дәлізге жатып, газды қосып, уланбақ болдым. Уақыт аз өтті, газ шығып жатқан сияқты, мен ұйықтай бастағандай болдым. Сосын дауыстарды, фонарь жарығын көрдім. Қызметкерлер келді”, – деді ол.

Полицейлер іштен жабылған есікті бұзып кіріп, Нечаевты сынған розетканың жанынан тапқан. Ол ток соғу үшін әдейі сымдарды ашып қойған екен. Қызметкерлер оны есін жиғызған соң алып кеткен.

Сотта, прокурор мен адвокаттың сұрақтарына жауап беріп, айыпталушы Расулдан отбасын бұзбауын, Светлананы қалдыруын сұрағанын айтты. Сонымен қатар Нечаевтың өзі де адал күйеу болмағаны анықталды: 15 жыл бұрын оның некесіз ұлы туған.

“Кінәңізді мойындайсыз ба?” – деп сұрады судья Жаннара Тлеубаева.

“Ішінара мойындаймын. Мені ұлымды әдейі өлтірді деп айыптады, бірақ мен оны әдейі өлтірмедім. Бәрі бір сәтте болды. Екі соққы ғана жасалды”, – деп түйіндеді Максим Нечаев.

Бұған дейін сотта отбасының көптен бергі досы Ирина Гранкина да куәлік берген. Оның айтуынша, Максим мен Светлана ұрысқанда, әйел әрдайым балаларды әкелеріне қарсы қоятын.

“Шамамен 12 жыл бұрын олар ажырасқалы жүргенде, Светлана барлық шаруашылықты, үйді сатып, Максты ақшасыз қалдыратынын айтқан. Ол балалардың Макс үшін қаншалықты қымбат екенін білген, сол себепті оларды алып кетсе, оған ауыр тиетінін түсінді. Ол “Мен оны сүймеймін, ол мені жалықтырды, мен оны қаламаймын” дейтін. Светлана мінезі ауыр еді, ал Макс сабырлырақ, байсалды болатын”, – деді куә.

Істі қарау жалғасып жатыр.

Айта кетейік, бұған дейін Шымкенттегі төбелесте қаза тапқан жігіт белгілі бапкердің ұлы болып шыққаны хабарланған еді.