ШҚО тұрғыны сотқа жүгінді: Бас прокурордың жеке қабылдауына жазудан бас тартуы заңсыз деп танылды

Фото: freepik.com

Шығыс Қазақстан облысының тұрғыны жеке мәселеге қатысты қабылдаудан бас тартқан соң Бас прокурор Берік Асыловқа талап арыз түсірді. Іс Астана қаласының мамандандырылған ауданаралық әкімшілік сотында қаралды. Азамат қабылдаудан бас тартуды заңсыз деп танып, бекітілген кестеге сәйкес жеке қабылдауға міндеттеуді сұрады. Бұл туралы Stan.kz ақпарат агенттігі хабарлайды.

Бұған дейін талапкер бірнеше рет Шығыс Қазақстан облысының прокуратурасына жүгінген. Ол Өскеменде жеке тұрғын үй салуға арналған жер телімін беруден бас тартуға және өзінің өтінішінің номенклатуралық іске тіркелуіне келіспеген. Прокуратура жауаптары қанағаттандырмаған соң, биыл 4 тамызда бекітілген кестеге сәйкес Бас прокурордың жеке қабылдауына жазылу туралы өтініш жолдаған.

“Азамат Нұрлан Әубәкіровтің арызы жай ғана қабылдауға жазылу емес. Ол үлкен мәселелерді, атап айтқанда ондаған миллиард теңгеге қатысты бірнеше сыбайлас жемқорлық фактілерін, Шығыс Қазақстан облысындағы құқық қорғау органдары басшылығының әрекетсіздігін және прокуратураның заңсыз әрекеттерін тікелей Бас прокурорға жеткізгісі келген”, – делінген мәліметте. 

7 тамызда өтініш облыстық прокуратураға қайта жіберіліп, азаматты 19 тамызға қабылдауға жазған. Ал азамат өзі шағымданбақ болған органға барудың қажеті жоқ деп санаған. Өйткені ол дәл осы органның заңсыз әрекеттерін даулауды жоспарлаған. Сонымен қатар облыстық прокуратураның төрт эпизод бойынша сыбайлас жемқорлық қылмыстарын тергеуге қатысты істі тоқтату туралы қаулысын заңсыз деп тану мәселесін көтермек болған. Бұған қоса, облыстық прокуратураның, Бас прокуратура қызметкерлерінің және таратылған Сыбайлас жемқорлыққа қарсы агенттіктің бірқатар басшыларының әрекетсіздігі туралы мәселе қозғауды көздеген. Осыдан кейін ол сотқа жүгінді.

Сот отырысында Бас прокуратура өкілдері қолданыстағы ережелерге сәйкес, облыс прокурорының жауабы жоқ тұлғалар Бас прокурор мен оның орынбасарларының қабылдауына жазылмайтынын, тек заңды күшіне енген сот актілерін даулағанда ғана қабылданатынын айтты. Сондықтан өтініш облыстық прокуратураға қайта бағытталған. Алайда сот талапкердің облыстық прокуратураға бірнеше рет жүгінгенін, оған ресми жауаптар берілгенін мәлімдеді. 

Нәтижесінде сот төмендегідей шешім қабылдады:  

– Бас прокуратураның азаматты қабылдауға жазудан бас тартуы заңсыз деп танылды;

– "Қазақстан Республикасы Бас прокуратурасы" мемлекеттік мекемесіне қабылдау мәселесі бойынша әкімшілік рәсімді соттың құқықтық ұстанымына сай аяқтау міндеттелді;

– Алайда Бас прокурордың өзіне қатысты талап қанағаттандырылмады.

Сот шешіміне тараптар Астана қаласының әкімшілік істер жөніндегі сот алқасына шағым түсіре алады.