"Шетелге кеткен заңсыз ақшаларды қайтару": Әділет министрлігі заң жобасына қатысты пікір білдірді

Шетелге заңсыз шығарылған активтерді қайтару туралы заң жобасы құқық қорғау және мемлекеттік органдармен жан-жақты талқыланып жатыр. Бұл туралы Әділет вице-министрі Ботагөз Жакселекова айтты деп хабарлайды Stan.kz ақпарат агенттігі.

"Шетелге заңсыз шығарылған активтерді қайтару туралы заң жобасын Әділет министрлігі әзірлеген. Қазір заң жобасы құқық қорғау және мемлекеттік органдармен жан-жақты талқыланып жатыр. Алдағы уақытта заң жобасы "Ашық НҚА" порталында жарияланады. Қоғам өкілдері оны талқылап, пікір білдіре алады”, - деді Ботагөз Жакселекова сенат отырысынан журналистердің сауалына жауап бере отырып.

Оның сөзінше, заң жобасын дайындау бойынша жұмыс қарқынды жүруде. 

“Бұл ауқымды мәселе. Сондықтан, оны жан-жақты талқылауға тиісінше уақыт керек", - деді вице-министр. 

Еске салайық, кеше Мәжіліс депутаты Ермұрат Бәпи Бас прокурор Берік Асылов пен Премьер-Министр Әлихан Смайыловтың атына жасаған депутатты сауалында Қазақстаннан заңсыз әкетілген активтерді қайтару жөнінде шаралар қабылдауды сұрады. Ол Қазақстаннан шетелге кеткен ақшаны қайтару жөніндегі комиссия тарапынан нақты іс-қимыл жасалмағанын атап өтті.

Бұған дейін шетелге заңсыз шығарылған 670 миллиард теңге Қазақстанға қайтарылғанын жазған едік.