Шетелдегі қандастарымызға елімізде тұрып, азаматтық алуға бір рет өтініш беру құқығы ұсынылады
ҚР Еңбек және халықты әлеуметтік қорғау министрі Біржан Нұрымбетов шетелдегі қандастарымызға Қазақстанда тұруға және азаматтығын алуға бір өтініш беру құқығы ұсынылатыны жайлы айтты, деп хабарлайды Stan.kz ақпарат агенттігі.
ҚР Еңбек және халықты әлеуметтік қорғау министрінің мәліметіне сәйкес, 1991 жылдан бері 1 миллион 57 мың этникалық қазақ тарихи отанына оралып, оралман мәртебесін алған. Ал 2019 жылы республикаға 9 993 отбасы келіп, 597 оралман отбасы қабылдау өңірлерінде қоныс аударыпты. Азаматтық алу үшін құжаттарды тапсырып үлгермеген 8,2 мың этникалық қазақ өткен жылғы оралман мәртебесін ұзарту бойынша біржолғы акция аясында Қазақстан азаматтығын алған.
Сонымен қатар министр қолданыстағы көші-қон жүйесін жетілдіру, елге келген этникалық қазақтар мен мигранттар үшін қолайлы жағдайлар жасау, сондай-ақ ішкі еңбек нарығын қорғау мақсатында көші-қон процестерін реттеу туралы заң жобасы әзірленгенін атап өтті. Құжат Қазақстан Республикасы Парламентінің Мәжілісінде қаралып жатыр.
«Заң жобасы аясында оралмандарға Қазақстанда тұруға және азаматтығын алуға бір өтініш беру құқығын қарастыру ұсынылады. Оралмандарға «бір терезе» қағидаты бойынша мемлекеттік қызметтер көрсету рәсімдерін оңтайландыру көзделіп отыр. Сондай-ақ, шетелдік білікті қызметкерлерді қазақстандық кадрлармен ауыстыру жөніндегі міндеттемелерді жұмыс берушілерге жүктеу ұсынылады. Рұқсат тек ішкі еңбек нарығында мамандар болмаған жағдайда ғана берілуі тиіс», – деп мәлімдеді Нұрымбетов.