Шерзат Полатты өлтіру ісі бойынша соттың басталатын күні белгіленді
Шерзат Полаттың ісі бойынша алдын ала сот тыңдалымы 2025 жылғы 10 сәуірде өтеді. Бұл туралы Stan.kz ақпарат агенттігі хабарлайды.
Фото: Жақындарының жеке архивінен
Алматы облысының сотының мәліметіне сенсек, іс бойынша алдын ала тыңдалым ашық режимде 10 сәуір күні сағат 12:00-де Талдықорған қаласындағы қылмыстық істер жөніндегі мамандандырылған ауданаралық сот ғимаратында, Қаблиса Жырау көшесі, 65-үй мекенжайында өтеді.
Адвокаттың айтуынша, бұның себебі – күдіктілердің көпшілігі дәл осы қаладағы изоляторда болуымен байланысты.
Сонымен бірге адвокат жәбірленушілердің азаматтық талап қоюды жоспарлап отырғанын айтты.
"Иә, біз азаматтық талап қоямыз және бұл барлық күдіктіге қатысты болады. Қылмыс туралы хабарламағаны үшін айыпталған кәмелетке толмаған жасөспірімге қатысты талап қою мәселесін Қаржаубаймен кеңескеннен кейін шешеміз. Нақты соманы әлі анықтаған жоқпыз", – деді адвокат.
Еске салайық, бұған дейін Шерзат Полаттың ісі Алматы облысының мамандандырылған ауданаралық сотына түсті. Жәбірленушілердің мүддесін бұрынғы қорғаушылар Саида Тәуекелева мен Айтбек Амангелдінің қатысуынсыз жаңа адвокаттар тобы қорғайды. Айтбек Амангелді мен қорғаушылар Шерзат Полаттың туыстары қазіргі адвокаттар тобынан бас тартқаны туралы хабарлаған еді. Кейіннен марқұм жасөспірімнің отбасы адвокаттардан бас тартпайтынын мәлім еткен.