Жоғарғы сот Шерзат Полат ісі бойынша сот отырысы неліктен Алматы облысында емес, Талдықорғанда өтетінін түсіндірді. Бұл туралы Stan.kz ақпарат агенттігі Bes.media басылымына сілтеме жасап хабарлайды.
Фото: Әлеуметтік желіден
Талғарлық жасөспірім Шерзат Полаттың өліміне қатысты қылмыстық іс бойынша алдын ала сот тыңдауы 2025 жылғы 10 сәуірге белгіленген еді. Қылмыс Алматы облысы Талғар ауданында жасалғанына қарамастан, сот отырысының Талдықорғанда, Жетісу облысының қылмыстық істер жөніндегі мамандандырылған ауданаралық сотының ғимаратында өтетіні көпшіліктің сұрағын тудырды.
Жоғарғы сот мәліметінше, іске қатысты сот отырысының Талдықорғанда өту себебі – аталған іс бойынша айып тағылған тоғыз адамның қазір осы қаланың тергеу изоляторында қамауда отыруы.
Құқық қорғаушы Мейірман Шекеев сот отырысы баспасөз өкілдеріне ашық түрде өтетінін, алайда Қуандық Бишімбаевтың ісіндегі сияқты онлайн трансляция жүргізілмейтінін атап өтті.
"Сот Талдықорғанда өтеді, себебі айыпталушылардың көпшілігі сол жерде. Істі Алматы облыстық соты қарайды. Келесі сот отырыстары Қаскелеңде өтеуі мүмкін. Бұл тек алдын ала тыңдау", – дейді Мейірман Шекеев.
Сотта Шерзат Полаттың отбасының мүддесін Мейірман Шекеев жетекшілік ететін алты адвокат – Жандос Палманов, Әлім Мұстафаев, Дина Досаева, Нұрболат Ібраев, Бақдат Амандосұлы және Бекзат Мязов қорғайды.
Еске салайық, 2024 жылы 4 қазанға қараған түні Талғарда 16 жастағы Шерзат Полат қаза тапқан еді. Оның өлімі қоғамда үлкен наразылық тудырды. Марқұмның әкесі туыстарымен және жергілікті тұрғындармен бірге әділ тергеу жүргізуді талап етіп, наразылық ұйымдастырды. Бірнеше күннен кейін, 12 қазанға қараған түні Нұрымовтар отбасының үйі толығымен өртеніп кетті. Бас прокуратура өрттің қасақана жасалғанын мәлімдеді. Алайда үйді өртеген күдіктілер әлі күнге табылған жоқ.
2025 жылдың 31 наурыз күні Шерзат Полаттың өліміне қатысты іс бойынша соттың басталатын күні 10 сәуір болып белгіленген еді.
