Президент балаларды құмар ойындарға тартқандарды қатаң жазалауға шақырды

Мемлекет басшысы Қасым-Жомарт Тоқаев жас ұрпақты түрлі құмар ойындарға қызықтырып, теріс жолға түсіргендерге қатысты жазаны қатаңдатуды ұсынды, деп хабарлайды Stan.kz ақпарат агенттігі. 

"Соңғы кезде жастар арасында лудомания, яғни құмар ойындарға тәуелділік белең алуда. Бұл кеселден құмарпаздардың өздері ғана емес, олардың отбасы, туыстары мен жақындары зардап шегеді.  Жасөспірімдеріміз заманауи технологиялардың ықпалымен құмар ойындарына оңай шырмалатын болды. Букмекерлер мен казинолар интернетте толассыз жарнама жасап, жұртты еріксіз еліктіруде. Мемлекет бұған шектеу қою үшін бірқатар маңызды шаралар қабылдады. Бірақ, бұл шаралар, әрине, жеткіліксіз.", - деді Тоқаев елордада өткен Ұлттық қоғамдық сенім кеңесінің отырысында. 

Бұған қоса, ол балаларды құмар ойынға тартқандардың жолын кесу керектігін сөз етті. 

"Жас ұрпақты құмар ойынның зиянды ықпалынан жан-жақты қорғауымыз керек. Мәселені шешу үшін жаңа тәсілдерді қолдану қажет. Балаларды және кәнігі құмарпаздарды ойынға тартқан немесе сондай жағдайға жол берген заңды тұлғалар әкімшілік жауапкершілікке тартылуға тиіс. Қажет болса, оларды лицензиясынан айырамыз. Қазір осындай заңсыз қызметі үшін жеке тұлғаларға 200 айлық есептік көрсеткіш көлемінде ғана айыппұл салынады. Шетел азаматтарының ел аумағында құмар ойындарды заңсыз жүргізіп, лотерея ұйымдастыру арқылы табыс табуына тыйым салу керек", -  дейді Тоқаев.  

Бұған дейін хабарлағанымыздай, Мемлекет басшысы еліміздегі ерекше күтімді талап ететін жандарға көрсетілетін әлеуметтік көмекті сынға алды.