Павлодарда үш жасар қыз көзіне қайшы тығып алған

Фото: Рixabay/Jeniffer Wai Ting Tan

Павлодарда үш жасар қыз абайсызда көзіне қайшы тығып алып, ауыр жарақатпен ауруханаға жеткізілді. Бұл туралы Stan.kz ақпарат агенттігі Pavlodar-Online порталына сілтеме жасап хабарлайды.

Дәрігерлер шұғыл микрохирургиялық операция жасап, баланың көзін және көру қабілетін сақтап қалды.  Сәбиге қасаң қабықтың тесіп өткен жарақаты, ішкі қабықтарының сыртқа шығуымен асқынған деп диагноз қойылған. Уақыт санаулы минуттарға ғана созылған.

Облыстық балалар ауруханасының мәліметінше, үш жасар қыз ауыр көз жарақатымен шұғыл жеткізілген. Абайсызда бала қайшыны тікелей көзіне тығып алған. Алғашында ата-анасы жарақаттың қаншалықты қауіпті екенін бірден аңғармаған. Алайда қызару, жас ағу және жарыққа қарай алмау белгілері күшейген соң, дереу медициналық көмекке жүгінген.

Баланың көзін сақтау үшін офтальмолог дәрігерлердің тұтас тобы жұмылдырылды. Мамандар қасаң қабықтағы жыртылуды тігіп, көздің бүтіндігін қалпына келтіру үшін күрделі микрохирургиялық ота жасады. 

Дәрігерлердің айтуынша, мұндай операция техникалық тұрғыдан өте нәзік, мұқият әрі жоғары дәлдік пен тәжірибені, толық шоғырлануды қажет етеді. 

"Ота офтальмологтар тобының және анестезиология қызметінің бірлескен жұмысының арқасында сәтті өтті. Павлодар облыстық балалар ауруханасы мамандарының үйлесімді әрекетінің нәтижесінде дәрігерлер тек көзді ғана емес, баланың көру қабілетін де сақтап қала алды", – деді дәрігерлер.

Қазір сәби ауруханадан шығарылып, амбулаториялық бақылауға алынған. Дәрігерлердің ескертуінше, мұндай жарақаттардың көбі үй жағдайында, көбіне санаулы секунд ішінде болады. Сондықтан өткір заттарды балалардың қолы жетпейтін жерде сақтау, кішкентайларды қараусыз қалдырмау және көз жарақатына күдік туған жағдайда бірден дәрігерге жүгіну аса маңызды.

• Алматыда дәрігерлер 1 жасар баланың ішінен 31 магнит алып шықты

• "5 жыл бойы жиналған": Алматыда дәрігерлер 25 жастағы әйелдің асқазанынан бір бума шаш алып шықты

Еске салайық, бұған дейін Бельгияда 28 жастағы қыз Рэйми Амелинкс абайсызда ұзындығы 17 сантиметрлік қасықты жұтып қойғанын жазған едік. Ол бірнеше күн бойы қасықпен жүргеннен кейін ғана дәрігерге жүгінген. Ақырында мамандар гастроскопия арқылы қасықты асқазанынан алып шыққан.