Павлодар облысында мұғалім жетім балаға арналған пәтерде заңсыз тұрып келген
Павлодар облысының прокуратурасы мемлекеттік тұрғын үйді бөлу барысында бірқатар заңбұзушылықты анықтады. Бұл туралы Stan.kz ақпарат агенттігі хабарлайды.
Фото: pixabay.com
Тексеру барысында Железин ауданында тұрғын үй комиссиясының шешімінсіз және тиісті жалдау шарттарын рәсімдемей пәтерлердің лауазымды тұлғаларға берілгені белгілі болды.
"Бұл ауданда "Кел де тұра бер" деген бейресми тәжірибе қалыптасқаны айтылды. Мысалы, Башмачин орта мектебінің мұғалімі 2022 жылдан бері жетім балаға арналған пәтерде тұрып келген. Сонымен қатар 70 жалға алушы жалдау ақысын мүлде төлемеген. Бұл қарыздың жалпы сомасы 6,5 миллион теңгеге жетсе де, жергілікті атқарушы органдар оны өндіріп алу бойынша ешқандай шара қабылдамаған", – делінген хабарламада.
Сондай-ақ мемлекеттік тұрғын үйдің үшінші тұлғаларға берілген фактілері тіркелді. Кезек тізімінде марқұм болған азаматтар бар болып шықты. Ал нағыз мұқтаж жандар бос пәтерлерге қол жеткізе алмаған. Мәселен, әкімдік балансында 65 бос пәтер бола тұра, тұрғын үй кезегінде 209 адам тұрған.
Мыңкөл ауылында төрт пәтер бос тұрғаны белгілі болды. Алайда сол ауылда көпбалалы отбасылар, жетім балалар және әлеуметтік осал топ өкілдерінен құралған бес адам тұрғын үй кезегінде әлі күнге дейін баспана күтуде.
Тексеру нәтижелері Мемлекеттік қызмет істері департаментінің Әдеп кеңесінде қаралып, Железин ауданының Нақты сектор экономикасы бөлімінің басшысына "қызметіне толық сәйкес еместігі туралы" тәртіптік ескерту берілді.
Еске салайық, бұған дейін Қазақстандықтар мемлекеттік тұрғын үй бағдарламасы арқылы баспаналы боламыз деп 346 миллион теңгеге алданып қалғанын жаздық. Алматы қалалық полиция департаменті тергеу басқармасының бастығы Айбат Мұрзамадиевтің айтуынша, қылмыскерлер халықтың әлеуметтік қорғалмаған топтарына мемлекеттік тұрғын үй бағдарламасына қатысуды ұсынып, алдап кеткен. Олардың алаяқтық әрекетінің салдарынан көптеген азамат материалдық шығынға ұшырады.