Павлодар мен Екібастұзда қатты желден ағаштар құлап, тұрғындар жарықсыз қалды (видео)
Видеодан скрин
Павлодар мен Екібастұз қалаларында қатты желден ағаштар құлап, тұрғындар жарықсыз қалды. Бұл туралы Stan.kz ақпарат агенттігі хабарлайды.
Екібастұзда 19 маусым күні сағат 16:44-те 500 кВ кернеулі электр жеткізу желісінде ақау болып, автоматты қорғаныс жүйесі іске қосылды. Ақауға қолайсыз ауа райы себеп болған.
Оқиға салдарынан энергия жүйесінде 800 мегаватт көлемінде шектеу енгізілді.
Мамандар желіні қайта іске қосу жұмыстарын жүргізіп, қазір Екібастұз энергия торабындағы жоғары кернеулі желілер бойынша энергиямен жабдықтау қалпына келтірілген.
Ұқсас жағдай Павлодарда да тіркелді. Қатты жел жолындағының бәрін жайпап өтуде. Тұрғындар жарықтың өшкенін хабарлап жатыр.
Павлодар облысының Ақсу қаласында дауыл кезінде ағаш құлап, бір әйел қаза тапты. Ағаштың сынған бұтағы әйелдің кеудесін тесіп өткен.
"Қоңырау сағат 17:29-да түсті. Әйелдің үстіне құлаған ағаш көкірек тұсынан тесіп өткен. Оқиға орнына келген медицина қызметкерлері 1968 жылы туған әйелдің қайтыс болғанын тіркеді", – делінген Павлодар облыстық жедел медициналық жәрдем станциясының хабарламасында.
"Түрің түрмеден шыққан адам сияқты": Қоғамдық көлікте ер адамның қазақстандық арудың сырт келбетіне тиіскені желідегілердің ашуын туғызды (видео)
