Пәтер мен қымбат жиһаз алған: Бірнеше рет қатаң сөгіс алған Әнуар Күмпекеев Көкшетау әкімі болып тағайындалды
5 жыл бұрын қатаң сөгіс алған Әнуар Күмпекеев Көкшетау қаласының әкімі болып тағайындалды. Бұл туралы Stan.kz ақпарат агенттігі хабарлайды.
Фото: Ақмола облысының әкімдігі
9 қарашада Көкшетау қаласының жаңа әкімі болып Әнуар Күмпекеев тағайындалды.
2018-2019 жылдар аралығында Күмпекеев Павлодар қаласының әкімі болып жұмыс істеді. Павлодар облысының әкімі 2018 жылы Әнуар Күмпекеевке 49 миллионға қызметтік пәтер сатып алғаны үшін қатаң сөгіс жариялаған еді. 2019 жылы қара ағаштан жасалған жиһаз сатып алғаннан кейін тағы сөгіс алған.
"Қала әкімі Әнуар Күмпекеевке қымбат пәтер алуға байланысты бюджет қаражатын тиімсіз және ысырап еткені үшін сөгіс жарияланды. Алайда ол қатесін тағы қайталады. Ол 6 миллион теңгеге қара ағаштан жасалған жиһаз сатып алды. Президенттің тапсырмасын елемейді. Оған бюджеттің басым емес шығыстарына тыйым салу туралы тікелей тапсырма берілді. 11 маусымда Күмпекеевке қатаң сөгіс жарияланды", – деді Павлодар облысының бұрынғы әкімі Болат Бақауов.
Содан шенеунік еңбек демалысына шығып, артынша қызметінен кетті. Алайда 2024 жылдың қарашасында Әнуар Күмпекеев Көкшетау қаласының әкімі болды.