Өздерін салық қызметкері деп таныстырған алаяқтар қазақстандық зейнеткерді сан соқтырды
Көкшетауда алаяқтар өзін салық қызметкері, кейін қаржы мониторингі мен полиция өкілі ретінде таныстырып, зейнеткерді 3,8 млн теңгені "қауіпсіз шотқа" аударуға көндірген. Қазір бұл факті бойынша тергеу жүргізіліп жатыр. Бұл туралы Stan.kz ақпарат агенттігі хабарлайды.
Полицияның мәліметінше, 11 ақпанда ер адамға WhatsApp мессенджері арқылы өзін мемлекеттік кірістер департаментінің қызметкері ретінде таныстырған белгісіз адамдар қоңырау шалған.
Олар зейнеткердің атына тіркелген жеке кәсіпкерлікті жабуды ұсынып, "рәсімді рәсімдеу үшін" SMS арқылы келген кодты айтуды сұраған.
Жеке деректерге қол жеткізгеннен кейін алаяқтар психологиялық қысымды жалғастырған. Біраз уақыттан соң ер адамға қайта қоңырау шалып, бұл жолы өздерін қаржы мониторинг агенттігі мен полиция қызметкерлері ретінде таныстырған. Олар "қаражатты қорғау" және тексеріс жүргізіліп жатыр деген сылтаумен зейнеткерді ақшасын "қауіпсіз шоттарға" аударуға көндірген.
Жалған қызметкерлерге сенген азамат 3,8 миллион теңгені дропперлердің шоттарына аударған. Кейін ғана ол алаяқтық схеманың құрбаны болғанын түсініп, құқық қорғау органдарына арызданды. Аталған факті бойынша сотқа дейінгі тергеу басталды.
- Қазақстандық зейнеткер алаяқтарға 10 миллион теңгеден астам ақша аударып жіберген
- 1 миллиард долларға жуық алаяқтық жасаған: Сыртқы істер министрлігі АҚШ-та екі Қазақстан азаматы ұсталғанын растады
Еске салайық, бұған дейін астаналық ер адам тегін сүзгі орнатып беремін деп, ауыл тұрғындарын 40 миллион теңгеге алдап кеткенін жазған едік. Бастапқыда күдікті уәдесінде тұрып, несиені төлеген. Бірақ одан кейін ауыл тұрғындарының жеке сәйкестендіру нөмірін, есепшоттарын, деректерін толық жинап, еш ескертусіз, екі банктен бірдей тауарлық несие рәсімдей бастаған.
Қазақстанда мемлекеттік қызметкерлерге қосымша кәсіп ашуға рұқсат берілді: Бұл кімдерге қатысты
