Жүк көліктері мен автобустар өндірісі 12% және 8%-ға төмендеді. Қаңтар мен тамыз аралығында елде 2023 жылдың сәйкес кезеңімен салыстырғанда жеңіл автокөлік 81 мың бірлікке аз өндірілген. Отандық жүк көліктері мен автобустар саны да 20%-ға қысқарды. Автокөлік саласының маманы Арсен Шакуовтың сөзінше, көлік өндірісінің қысқаруына індет пен көрші мемлекетке салынған санкциялар себеп болды.

"Көлік өндірісінің азаюы әлемдік брендтердің Ресейден шығуымен байланысты. Hyundai мен Kia Ресейге жөнелтілмейді. Осыған байланысты автокөліктер өндірісі қысқарды. Бұған дейін 100 мың көлікке қажеттілік болса, оның 40 мыңы Ресейге кететін. Өндіріс бұл жағдайдан хабардар, сондықтан мұндай сандағы көліктерді шығармайды", – деді автокөлік сарапшысы Арсен Шакуов.

Көлік сатылымы да елде төмендеді. Мәселен, тамыз айында ресми дилерлер 18 мыңға жуық жаңа жолаушылар мен коммерциялық көліктерді сатқан. Бұл 2023 жылдың дәл осы айымен салыстырғанда 2%-ға аз. Небәрі 8 айда 120 мыңға жуық көлік сатылды. Қазақстан автомобиль одағының президенті Анар Мақашеваның айтуынша, бұл жақсы көрсеткіш.

"Тамыз айындағы ең танымал 10 модельдің тоғызы Қазақстанда шығарылды. Бұл отандық автомобиль өнеркәсібінің тұрақты дамуының және тұтынушылардың қазақстандық өнімге деген жоғары сенімінің дәлелі. Нарық көлік құралдарының түрлеріне қатысты тұтынушылардың қалауларының өзгеруін байқауды жалғастырып жатыр. Осыдан кейін көліктердің өндірістік ассортиментінде де өзгерістер байқалады", – деді Қазақстан автомобиль одағының президенті Анар Мақашева.

Қазіргі уақытта республикада жеңіл автокөліктер мен коммерциялық техника шығаратын 8 зауыт бар. Қостанай облысында тағы бір кәсіпорын ашылады. Құрылыс өткен жылдың қазан айында басталған. Алғашқы сынақ машинасы 2025 жылдың шілдесінде өндірістік желілерден шығады деп жоспарланып отыр.

Талқылау