Өтетін күні белгіленбеген "Қайрат – Реал Мадрид" ойынына билеттер сатылып жатыр: Ең арзаны 236 мыңнан басталып, 2 млн теңгеден асады

Фото: Сайттан скрин

Әлі күні белгіленбеген “Қайрат – Реал Мадрид” матчына билеттер сатыла бастады. Қазақстандықтар билеттердің шын екеніне күмән келтіріп жатыр. Бұл туралы Stan.kz ақпарат агенттігі хабарлайды.

Рortalbilet.kz сайтында “Қайрат – Реал Мадрид” матчына билеттер сатылып жатыр. Билеттердің ең арзаны 236 мыңнан басталып, 2 миллион теңгеден асады. 

Сайтта билетті брондау уақыты – 30 минут делінген. 

Фото: Сайттан скрин

Қазақстандықтар да сайттан билеттердің сатылымға шыққанын көрген. Алайда билеттердің бағасы әртүрлі. 

“Біз алдымен Ticketon сайтынан көрдік. Енді Рortalbilet.kz сайтын қарап отырмын. Билет бағасы 333 840 теңгеден және 801 220 теңгеден басталады”, – дейді желі қолданушысы. 

“Әлі күні белгілі болған жоқ қой”, “Жалған ақпарат таратпаңыздар”, “Бұл алыпсатарлардың сайты”, “Алаяқтар жатпайды”, “УЕФА регламенті бойынша билет бағасы стандар бойынша қойылады”, – деп жарыса жазды желідегілер.

Сайттағы билеттердің сатылып жатқанына қатысты Қазақстан футбол федерациясының баспасөз қызметі пікір білдірді.”

“Негізі кесте әлі белгісіз. Кестені 30 тамыз күні УЕФА жариялайды. Олар әлі Реал Мадридпен матчтың қашан болатынын айтқан жоқ. Билет туралы ақпаратты әлі Ticketon да, “Қайрат” та жариялаған жоқ. Олардан басқалардың таратып жатқан ақпараты, әсіресе билетке қатысты бәрі жалған”, – деді Сейл Қожатай.

Еске салсақ, бұған дейін “Қайрат” шотландиялық “Селтикті” жеңіп, алғаш рет Чемпиондар лигасының топтық кезеңіне жолдама алған еді. Күні кеше “Қайраттың” Чемпиондар лигасында Реал Мадридпен кездесетіні белгілі болды.