"Өте ұят": Димаш Құдайберген қазақ тіліне қатысты мәлімдеме жасады
Танымал әнші Димаш Құдайберген қазақстандықтарды қазақ тілін құрметтеуге және мақтан тұтуға шақырды, деп хабарлайды Stan.kz ақпарат агенттігі.
Әнші әлеуметтік желідегі парақшасында бейне хабарлама жариялаған. Ол кадрларда қазақстандықтарды мемлекеттік тілді бағалауға шақырады. Әнші азаматтардың ана тілінде сауатты, еркін сөйлеуін армандайтынын айтты.
"Қазақ тілі бізден басқа ешкімге керек емес. Қазіргі уақытта бірнеше тіл білу керек, бірақ қазақ бола тұра ана тіліңді білмеу – ұят", – деді Димаш Құдайберген.
- Димаш Құдайберген: Әлемде қанша талантты жан бар, Құдай неге маған үлкен сахнаға шығуға мүмкіндік берді?!
- "Оны ату жазасын кескенде Горбачевке 17 елдің басшысы хат жазған": Қайрат Рысқұлбековтың інісі Желтоқсан оқиғасы, ағасының балалық шағы мен жұмбақ өлімі жайлы айтты
Ол қазақ тілінде сөйлей отырып, өз отандастарына, туған тіліне деген құрметін білдіретінін баса айтты.
"Достар, жақында тіл төңірегінде сөз қозғаған бір жобаға осындай үндеу түсіріп берген болатынмын. Біздің жастарымыз тіліміздің таза болуына, өз жерімізде тіліміздің құнсызданып кетпеуі үшін еңбек ету керек деп ойлаймын. Қазақ тілімен қаруланған қандастарымыз, тілі біраз шорқақтау болып жүрген бауырларымыз қазақша үйреніп бастағанда қолдан келгенше қатесін түзеп жіберіп, көмектесіп, демеу беріп отырайық. Біз Қазақстан деп аталатын өз жерімізде, өз елімізде мемлекеттік тілде яғни ана тілімізде сөйлеуіміз керек. Тілімізді мақтан тұтып жүрейік", – деп қосты әнші.