Өскемендегі құрылысы аяқталмаған "Азия Авто" зауыты саудаға шығарылды

Фото: Электрондық сауда порталы

Шығыс Қазақстан облысының мемлекеттік мүлік және жекешелендіру департаменті Өскемен қаласындағы аяқталмаған "Азия Авто" зауытын, сондай-ақ оған іргелес орналасқан ғимараттар мен құрылыстары бар төрт жер телімін мемлекеттік ұйымдарға беру үшін саудаға шығарды. Бұл туралы Stan.kz ақпарат агенттігі хабарлайды. 

Кешеннің жалпы аумағы 515 гектардан асады.

Лоттың бағалау құны – 23,3 млрд теңге. Аумақта орналасқан тауарлар мен материалдар 124 млн теңгеге бағаланған. Жалпы тізімде 37 мыңнан астам мүлік бірлігі бар.

7 сәуірде өтетін саудаға мемлекеттік мекеме немесе мемлекеттік кәсіпорын түріндегі заңды тұлғалар қатыса алады. Олардың қатарында жетім балаларға арналған білім беру ұйымдары, мектепке дейінгі және орта білім беру мекемелері, сондай-ақ медициналық-әлеуметтік ұйымдар бар.

Егер нысандар берілмеген жағдайда, лот барлық ниет білдірушілер үшін ашық сатылымға шығарылатын болады.

Осы жылдың ақпан айында өнеркәсіп және құрылыс министрі Ерсайын Нағаспаев ведомство Өскемен қаласындағы "Азия Авто" зауытының алаңын жаңа инвесторларға беру нұсқасын қарастырып жатқанын хабарлаған болатын.

2025 жылы сот "Азия Авто" компаниясының бұрынғы басшылары Анатолий Балушкин мен Ерік Сағымбаевқа сырттай үкім шығарды. Тергеу нұсқасы бойынша, олар банк несиелерін өтеуден және бюджетке салық төлеуден жалтару мақсатында 230 млрд теңгені жымқырған. Бұл қаражат автокөліктерді өнеркәсіптік құрастыру зауытын салуға арналған еді.

Балушкиннен "Рахманов қайнары", "Нұртау" және "Порт Фортуна" демалыс базалары сияқты 77 жылжымайтын мүлік нысаны, сондай-ақ 1000 бірлік жылжымалы мүлік тәркіленді.

Ресей Қазақстанға "Азия Авто" компаниясының бұрынғы басшылары Анатолий Балушкин мен Ерік Сағымбаевты Ресей Федерациясы азаматтары болғандықтан, беруден бас тартты.

2022 жылдың мамыр айында Өскемен қаласындағы  "Азия Авто" зауытының ғимараттарын сату әрекеті жасалғанымен, сауда тоқтатылған. Алайда басқа лоттар, атап айтқанда жер телімдері бойынша аукциондар өткен.

2024 жылдың тамыз айында "Рахманов қайнары" шипажайы сауда нәтижесінде мемлекеттік органдардың балансына берілді.