Қазақстанда 2 миллиард доллар тұратын ең ірі ЖИ орталығы ашылады
Фото: Freedom Holding Corp.
Freedom Holding Corp. және Қазақстан Республикасының жасанды интеллект және цифрлық даму министрлігі NVIDIA компаниясымен бірлесіп, егеменді жасанды интеллект (ЖИ) инфрақұрылымын құру және таланттарды дамыту жөніндегі ірі аймақтық бастаманы іске қосатынын хабарлады. Бұл қадам Қазақстан мен Орталық Азияның ЖИ саласындағы көшбасшылық ұстанымын күшейтуді мақсат етеді. Бұл туралы Stan.kz ақпарат агенттігі хабарлайды.
Жоба Freedom Holding Corp. басшылығымен Қазақстанда егеменді жасанды интеллект орталығын құруды және NVIDIA инфрақұрылымына негізделген кезең-кезеңмен іске асыру тәсілін қамтиды. Министрлік ірі көлемді ЖИ инфрақұрылымын орналастыру мен пайдалануға қолайлы жағдай жасайды және инженерлер мен зерттеушілерді даярлауға арналған жасанды интеллект академиясы мен зерттеу зертханасын дамытуға қолдау көрсетеді.
Құны 2 миллиард АҚШ долларын құрайтын бұл жоба Қазақстандағы 100 МВт қуатты технологиялық алаңда жүзеге асырылады. Freedom Holding Corp. негізгі қаржылық әрі іске асыру серіктесі болуды жоспарлап отыр.
Ынтымақтастық ЖИ экожүйесін қалыптастыруға, инновацияларды жеделдетуге және Орталық Азияның цифрлық экономикасы үшін жаңа буын мамандарын даярлауға бағытталған.
Қазақстан Республикасы Премьер-министрінің орынбасары және Жасанды интеллект және цифрлық даму министрі Жаслан Мадиев бұл серіктестікті елдің ұлттық ЖИ стратегиясын жүзеге асырудағы маңызды кезең деп атап өтті. Ол бұл бастама экономика мен бәсекеге қабілеттілікті арттырып, өңірге жаңа мүмкіндіктер ашатынын айтты.
