"Оңтүстік Кореядан автокөліктер әкелемін": Астанада әйел адамдарды 420 миллион теңгеден аса қаражатқа алдаған

Фото: pixabay.com

Астанада "Оңтүстік Кореядан автокөліктер әкелемін" деп 70-тен астам адамды алдаған әйел 6 жылдан аса уақытқа бас бостандығынан айырылды. Ол осы әрекеті арқылы 420 миллион теңгеден аса қаражат жымқырған. Бұл туралы Stan.kz ақпарат агенттігі хабарлайды. 

Прокуратура мәліметінше, әйел сатып алушыларға шетелде байланыстары бар екенін айтып, толық алдын ала төлем жасаған жағдайда арзан көліктер әкеле алатынын уәде еткен. Заңдылық көрінісін беру үшін ол клиенттерге автокөліктерді көрсеткен. Бірақ оларды алдын ала автокөлік жалдау компанияларынан алған.

Мысалы, бір зардап шеккен адамға ол төрт көлік уәде етіп, 14,5 миллион теңге алған. Көліктерді ресми тіркеу кейін болады деп айтқан. Алғашқы кезде әйел өтірік екенін жасыру үшін көліктердің жалдау ақысын уақытылы төлеп отырған.

Сотта прокурорлар әйелдің бастапқыда уәде етілген көліктерді жеткізу мүмкіндігі жоқ екенін, жалдау келісімдерін тек қылмыстық ниетпен жасағанын дәлелдеді. Ол алған ақшаны жеке қажеттіліктеріне жұмсаған.

• Түркістан облысында полицейлер өздеріне оқ атқан ер адамды атып өлтірді

• Күйеуінің көзіне шөп салып жүргенін тексермек болған қазақстандық алаяқтарға алданып қалды

Сот отырысында әйел кінәсін толық мойындады. Сот барлық зардап шеккендердің азаматтық талаптарын қанағаттандырды.

Астана прокуратурасы азаматтарға ресми құжаттары мен өкілеттігі жоқ адамдармен мәміле жасамауға кеңес береді.