Нұрлан Нығматулиннің ұлына қатысты рейдерлік әрекеттер бойынша қылмыстық іс қозғалды
Мәжілістің экс-төрағасы Нұрлан Нығматулиннің үлкен ұлы Нұржан Нұрлановтың үстінен қылмыстық іс қозғалды. Бұл туралы Stan.kz ақпарат агенттігі КазТАГ басылымына сілтеме жасап хабарлайды.
Фото: “Бәйтерек” ұлттық басқару холдингі
Бұған дейін отандық кәсіпкер Қанат Әміркин Нұрлан Нығматулиннің үлкен ұлы Нұржан Нұрланов өзінен "Алатаудорстрой" компаниясын тартып алып, одан үлкен сомада ақша талап еткенін айтқан еді.
Ішкі істер министрлігі осыған қатысты пікір білдірді.
“Аталған факт бойынша Алматы қалалық полиция департаментінің тергеу басқармасы Қылмыстық кодекстің 389-бабымен (озбырлық) алдын ала тергеу жүргізіп жатыр. Қазір болған жағдайды толық, жан-жақты және объективті зерттеу үшін тергеу әрекеттері жүріп жатыр”, – деп мәлімдеді Ішкі істер министрлігі.
Алайда кәсіпкер қылмыстық істің “Озбырлық” бабы бойынша қаралатынына күмәнмен қарайды.
“Тергеу жүріп жатыр. Компанияның қайта рәсімделуі бойынша іс Қылмыстық кодекстің "Озбырлық бабы бойынша тіркелген. Бірақ менің болжауымша, бұл іс рейдерлік әрекетке қайта біліктіріліп, "Алатаудорстрой" компаниясы, сондай-ақ шығыс айналма автомобиль жолының бойындағы жер учаскесін заңсыз иеліктен шығару бойынша “Алаяқтық” бабымен қаралады”, – деді Әміркин.
Бұған дейін Нұрлан Нығматулин мен бауыры Ерланның қылмыстық іске қатысы бар екені анықталған еді.