"Жекешелендіруден түскен ақша қайда?": Депутат республикалық мүлікті басқару саясатын сынады

Фото: instagram.com/kuchinskaya_yu.v

Парламенттің бірлескен отырысында мәжіліс депутаты Юлия Кучинская республикалық мүлікті басқару саясатына қатысты сын айтып, қаржы министрі Мәди Такиев пен жоғарғы аудиторлық палата төрағасы Әлихан Смайыловқа сауал қойды. Бұл туралы Stan.kz ақпарат агенттігі хабарлайды.

Депутаттың айтуынша, 2024 жылғы бюджеттің орындалуы туралы есепте республикалық мүлікті жекешелендіруден 1,4 млрд теңге түскен. Бұл жоспардың 140 пайызына тең.

Осыған байланысты депутат жекешелендіру ауқымы мен республикалық бюджетке және Ұлттық қорға түсетін кірістер арасындағы сәйкессіздікке назар аударды. Сондай-ақ Кучинская бұл салада ашықтық жоқ екенін айтып, мемлекеттік активтерді сенімгерлік басқаруға беру тиімділігі мен шарттарына күмән келтірді.

"Жекешелендіру мен активтерді сату мемлекетке елеулі қаржылық пайда әкелуі керек. Алайда іс жүзінде бюджет пен Ұлттық қордың тиісінше толықпағанын көріп отырмыз. Бұдан басқару мен есептілікке қатысты сұрақтар туындайды", – деп атап өтті депутат.

Ол жекешелендіру рәсімдері, мәмілелердің қаржылық нәтижелері, кірістерді бақылау тетіктері және мемлекеттік активтердің сенімгерлік басқаруға қандай шарттармен берілетіні туралы түсініктеме беруді талап етті.

"Ашықтыққа келсек, бізде бірыңғай сауда-саттық алаңы бар. Онда барлығы ашық, кез келген заңды және жеке тұлға тіркеліп, сатып алуларға қатыса алады. Жекешелендіру жөнінде ұлттық кеңсе бар. Соңғы жарты жылда жұмыс жүргізілді. 470 нысан іріктеп алынды. Олар Жекешелендіру жоспарына енгізіледі", – деп жауап берді қаржы министрі Мәди Тәкиев.