Алматы әуежайы мен Fly Arystan-ға қатысты тергеу жүргізілуде
Алматы халықаралық әуежайы мен қазақстандық Fly Arystan лоукостеріне қатысты тергеу жүргізіліп жатыр. Бұл туралы Stan.kz ақпарат агенттігі хабарлайды.
Фото: flyarystan.com
Бәсекелестікті қорғау және дамыту агенттігі төрағасының орынбасары Болат Самбетовтың айтуынша, бұл – екі бөлек тергеу, және олар әлі аяқталған жоқ.
"Кәсіпкерлерден Алматы халықаралық әуежайы тарапынан бәсекелестікті шектеуге байланысты шағымдар түсті. Әуежай аумағында қызмет көрсетуші компанияларды таңдау кезінде заңбұзушылық белгілері анықталып, агенттік тиісті ескерту жасаған. Алайда ол орындалмады. Қазіргі уақытта осы мәселеге қатысты тергеу жүргізілуде", – деді Самбетов.
Сонымен қатар, спикер өткен жылдың соңында жолаушылар әуе тасымалы қызметінің бағасы мен сапасына қатысты көптеген шағымдарды қарастыра отырып, агенттік авиабилеттер құнына мониторинг жүргізгенін атап өтті.
"Мониторинг нәтижесінде заңбұзушылық белгілері анықталды. Жақында біз Fly Arystan әуе компаниясына қатысты монополиялық жоғары баға белгілері бойынша тергеу бастадық. Қазіргі уақытта тергеу жүріп жатыр. Егер заң бұзушылық фактілері дәлелденсе, тиісті шаралар қабылданады", – деді Самбетов.
Еске салсақ, осыған дейін монополияға қарсы орган FlyArystan әуекомпаниясы билет бағасын ретсіз өсіргенін анықтаған еді.