Оқиға елордадағы Tilly Willy балабақшасында болды. Баланың мектепке дейінгі мекемеге барып жүргеніне енді ғана екі апта болыпты, яғни 28 қаңтар мен 13 ақпан аралығы.

Анасы ұлының денесінен көгерген жерлерді байқап, балабақшаға барып бейнебақылау камерасын қараған. Осылайша ол камерадан тәрбиешінің баласын үнемі сүйреп дәретханаға қарай апаратынын көрген. Ал ол жақтан баланың айқайлаған дауысы мен соққының дыбысы естілген.

Анасының айтуынша, баласы өзін өзі басқара алмайтын болып кеткен. Ол басынан жиі соққы алғандықтан, қалпақ кигізетін кезде қорқақтайды екен. Тіпті кекештеніп, кіші дәретін жіберіп қойып, түнде жылап оянатын күйге түскен.

Зардап шеккен баланың анасы кадрлардан тәрбиешінің балаларға қарамайтынын байқаған. Сондай-ақ теледидардан балаларға арналған мультфильмдер қосып беріп, өзі телефон ақтарып отырады екен.

Ата-анасының шағымынан кейін әйел жұмыстан шығарылған. Алайда баланың психикасын қалпына келтіруге енді кім көмектесетіні белгісіз.

Аталған жағдайға қатысты Stan.kz тілшісі Астана полиция департаментінен мән-жайды сұрап білді.

Полиция мәліметінше, сотқа дейінгі тергеп-тексеру жүріп жатыр.

“Қазір кәмелетке толмаған баланы тәрбиелеу жөніндегі міндеттерді тиісінше орындамау фактісі бойынша сотқа дейінгі тергеп-тексеру жүріп жатыр. Қорытындысы бойынша заңға сәйкес шаралар қабылданады”, – делінген хабарламада.

Талқылау