БҚО тұрғынын алимент төлемегені үшін 1 жылға сотталды
Батыс Қазақстан облысының тұрғыны алимент төлемегені үшін сотталды. Бұл туралы Stan.kz ақпарат агенттігі хабарлайды.
Фото: freepik.com
"Батыс Қазақстан облысы Бәйтерек ауданы прокуратурасының дәлелдемелері негізінде Қазақстан Республикасы Қылмыстық кодексінің 139-бабына сәйкес "Балаларды асырауға арналған қаражатты төлеу бойынша міндеттемелерді орындамау, еңбекке жарамсыз ата-анасын, еңбекке жарамсыз жұбайын асырауға арналған қаражатты төлеуден жалтару” бабы бойынша күдіктінің кінәсі дәлелденді. Осылайша, 2021 жылдан бастап борышкердің 2 787 838 теңге мөлшерінде қарызы жинақталған. Әкімшілік жауапкершілікке тартылғанына қарамастан, бірнеше жыл бойына өз міндеттерін қасақана орындамаған", – делінген ақпаратта.
Батыс Қазақстан облысының кәмелетке толмағандардың істері жөніндегі мамандандырылған ауданаралық сотының үкімімен Бәйтерек ауданының тұрғыны кінәлі деп танылып, оған 1 жылға бас бостандығын шектеу жазасы тағайындалды. Үкім заңды күшіне енді.
Еске салсақ, осыған дейін Қазақстанда алименттерді есептеу тәртібін өзгерту ұсынылғанын жазғанбыз.