Алматыда 1 қыркүйектен бастап коммуналдық қызмет тарифтері көтеріледі

Алматыда 1 қыркүйектен бастап су мен жылудың тарифтері көтеріледі. Бұл туралы Stan.kz ақпарат агенттігі хабарлайды.

Фото: istock.com

Жаңа тарифтер туралы қалалық табиғи монополияларды реттеу комитетінің басшысы Әсел Бөденеева мәлімдеді.

Түзетулерге сәйкес тарифтер төмендегідей болып бекітілмек:

- сумен жабдықтау: орташа қамтамасыз ету – 122,38 теңге/м³ (өсім 23%), халық үшін – 98,97 теңге/м³ (өсім 82,53%);

- су бұру: орташа қамтамасыз ету -80,41 теңге/м³ (өсім 50,95%), халық үшін - 80,03 теңге/м³ (өсім 173,78%);

- жылу энергиясын беру, бөлу және жеткізу: орташа тариф – 10 892,83 теңге/Гкал (өсім 12%), халық үшін – 8 058,32 теңге/Гкал (өсім 12%);

- ыстық сумен қамтамасыз ету: жылыту кезеңінде – 575,09 теңге/м³ (өсім 10,5%), жылу аралық кезеңде – 529,96 теңге/м³ (өсім 10,4%).

Энергетика және сумен жабдықтау басқармасы басшысының орынбасары Нұрбақыт Серікбай 2025 жылы Алматыда кемінде 104 шақырым су құбыры желісін, 73 шақырым кәріз желісін, 39 шақырым жылу желісін және 120 шақырым электр желісін жаңарту жоспарланып отырғанын атап өтті.

10 текше метрден көп жұмсайтындар 100% артық төлейді: Елде суды көп қолданатындар үшін жоғарылатылған тариф енгізіледі

Қазіргі уақытта инженерлік желілердің тозуы орта есеппен 50% құрайды.

Жұмыспен қамту және әлеуметтік бағдарламалар басқармасының басшысы Бауыржан Жаубасов 2023 жылдың шілдесінен бастап билік тоғыз санаттағы азаматтар үшін тұрғын үй-коммуналдық қызмет бағасының қымбаттауына байланысты қосымша өтемақы төлеп келгенін атап өтті. 1 жыл ішінде 140 мыңнан астам адам 0,8 АЕК көлемінде ай сайынғы әлеуметтік төлем алған. Қыркүйек айынан бастап тарифтер көтерілетіндіктен, әкімдік төлемдерді жалғастыруды көздеп отыр. Мәслихаттың тиісті шешімінің жобасы қыркүйек айында бекітуге ұсынылады. Ережелер 2025 жылдың 1 сәуіріне дейін күшінде болады.

"Әлеуметтік төлемдерді алу үшін Алматы қаласында тұрақты тіркеу және тұрғылықты жері болуы, облыстық жұмыспен қамту және әлеуметтік бағдарламалар басқармаларына өтініш беру қажет. Бұған дейін көмек алып келгендерге қайта өтініш берудің қажеті жоқ. Аудандық әкімдіктер мәліметтерді жаңартады", – деді Жаубасов.

Еске салсақ, бұған дейін Алматыда 3 тамыздан бастап қоғамдық көлікте жүруге арналған жаңа тариф енгізілгені туралы жазған едік.