Түркістан облысында әйелдер мен балалардың құқығын қорғау жұмысы тиімді жүзеге асырылып жатыр

Мемлекет басшысы Қасым-Жомарт Тоқаев отбасы институтына қолдау білдіріп, осы салада кешенді саясат жүргізілетінін айтқан еді. Оның сөзінше, өскелең ұрпаққа тәлім-тәрбие беруде отбасының алар орны ерекше. Осы орайда еліміздегі отбасы құндылықтары және ата-ана мен бала мәселелерін шешумен айналысып жүрген - әйелдер істері мен отбасылық-демографиялық саясат комиссиясының жұмысын ерекше айтып өткеніміз жөн. Түркістан облысы әкімі жанындағы Әйелдер істері және отбасылық демографиялық саясат жөніндегі комиссияның белсенді мүшесі Инара Намазбаева Түркістан облысы бойынша отбасы институтын жүзеге асыруда қандай жұмыстар атқарылып жатқанын Stan.kz тілшісіне айтып берді. 

Фото: 4-institut-semi.6md.ru

Қазақстанда соңғы жылдары жауапкершілігі мол, құзыретті әрі сауатты ата-ана қалыптастыру үшін жұмыс істеп жатқан жобалар мен бағдарламалардың қатары күрт өсті. Бұл қазіргі қоғамда жанұяның алар орны ерекше екенін білдіреді.  

Түркістан өңірінде әрбір үшінші кәсіпкер – әйел кәсіпкерлер

Елімізде 2030 жылға дейін отбасылық және гендерлік саясат тұжырымдамасын жүзеге асыру мақсатында, Түркістан облысы әкімі жанындағы әйелдер істері және отбасылық-демографиялық саясат жөніндегі комиссиясы тарапынан нақты жұмыстар жүргізіліп жатыр.

Инара Намазбаеваның сөзінше, комиссияның мемлекеттік органдары мен үкіметтік емес ұйымдарымен 2024 жылдың басынан бері бірқатар ұйымдық іс-шаралар жүзеге асырылды. 

"Түркістан облысында әйелдер қауымы барлық салаларда жемісті еңбектер көрсетіп жатыр. Облыс көлемінде шамамен 213 020 мың кәсіпкер болса, оның 68 мыңға жуығы шағын және орта бизнеске басшылық ететін әйел азаматтар. Статистикаға сәйкес шағын және орта кәсіпкерліктің 31,9%-ында әйелдер басшылық етеді. Демек, Түркістан өңірінде жұмыс істейтін әрбір үшінші кәсіпкер әйел кәсіпкерлер", – дейді Намазбаева.

Сондай-ақ ол әйелдер кәсіпкерлігін қолдау мақсатында еліміздегі алғашқы "Әйелдер кәсіпкерлігін дамыту" орталығы 2023 жылдың қараша айында Түркістан қаласында құрылғанын жеткізді. 

"Орталықтың мақсаты кәсіпкер әйелдердің мүмкіндіктерін кеңейту, бизнесті жүргізу үшін оларға қолайлы жағдайлар жасау. Қазіргі уақытта орталыққа 2000-нан астам кәсіпкер әйелдер, кәсіпкерлік бастамасы бар әйелдер және бастауыш стартаперлер кеңес алу үшін жүгінді. Қазіргі жағдай бойынша Түркістан облысында іс басындағы 5658 мемлекеттік қызметшінің 1564-і немесе 27,3%-ы әйелдер. Оның ішінде, 249-ы немесе 15%-ы басшылық лауазымдарды атқарады", – дейді Намазбаева. 

Айтуынша, өңір бойынша әйелдердің ең көп бөлігі білімі беру мен денсаулық салаларында жұмыс істейді.

Комиссия зорлық-зомбылық көрген әйелдерге медициналық және психологиялық көмек береді

Түркістан облысы әкімі жанындағы Әйелдер істері және отбасылық демографиялық саясат жөніндегі комиссияның белсенді мүшесі Инара Намазбаеваның сөзінше, облыста отбасылық құндылықтарды дәріптеу, жанұяның беріктігін сақтау, ажырасудың алдын алу мақсатында түрлі жобалар ұйымдастырылып жатыр. 

"Мәселен "Отбасы бақыт мекені", "Тәрбиенің ең тамаша мектебі – отбасы", "Жас отбасындағы қақтығыстар", "Жанұя – бақыт тілегі", "Тәрбие тал бесіктен басталады", "Ұлттық құндылық – отбасы тәрбиесінде", "Тәртіп-тәрбие бастауы", "Отбасы ең үлкен құндылық" тақырыптарында отбасыларға 10 психо-профилактикалық жұмыстар жүргізіліп, 500-ге жуық жас отбасы қамтылды. Түркістан облысы әкімі жанындағы әйелдер істері және отбасылық-демографиялық саясат жөніндегі комиссиясы, Түркістан облысы Полиция департаментінің жергілікті полиция қызметі басқармасы, Түркістан облысы әйелдерді қолдау үкіметтік емес ұйымдарының бірлескен жоспары бекітілді", – дейді Намазбаева. 

Намазбаева аталған комиссия тарапынан отбасылық-тұрмыстық қатынастар саласында әйелдер мен балалардың құқықтарын қорғау бойынша оң жұмыстар атқарылғанын айтты.

“Әйелдерге жасалатын зорлық-зомбылықтың алдын алу мақсатында мүдделі органдармен, үкіметтік емес ұйымдармен және қоғамдық кеңестермен бірлескен жұмыс атқарылып жатыр. Комиссия мемлекеттік органдармен, үкіметтік және үкіметтік емес қоғамдық бірлестіктермен, "Қазақстан іскер әйелдер ассоциациясы" ҚБ Түркістан облысының филиалы, "Сана сезім" Әйелдер бастамаларының құқықтық орталығы" ҚБ және "Сенім-Ай" ҚБ-нің "Көмек" дағдарыс орталығымен тығыз байланыстығын арттыру мақсатында жиі кездесіп, пікір алмасады”, – деді Намазбаева. 

Сондай-ақ жәбір көрген қыз-келіншектерге құқықтық көмек көрсетіліп, зорлық-зомбылықтың түрін талдап, категориясын анықтап, медициналық және психологиялық кеңестер беріледі екен.

Әйелдерге қатысты зорлық-зомбылық миллиондаған адамдарға әсер ететін жаһандық мәселеге айналған. Дегенмен, дүние жүзінде зардап шеккендерге көмек пен қолдау көрсетуге дайын ұйымдар мен бастамалар көбейіп келеді. Бұл жұмыстағы басты рөл зорлық-зомбылық құрбаны болған әйелдерге жан-жақты көмек көрсететін мамандандырылған орталықтарға тиесілі.

Әйелдерге көмек көрсету орталықтары мәселенің барлық аспектілерін ескеретін кешенді әдісті қолданады. Бұл жай ғана жедел жәрдем емес, физикалық және психологиялық денсаулықты қалпына келтіруге көмектесетін маңызды қолдау жүйесі. Түркістан облысында әйелдерді қолдау және қорғау мақсатында жұмыс істеп жатқан орталықтардың басты мақсаты да осы.