"Төлеген деген атпен жарыстарға ұл боп шықтым": Маңғыстау облысында ат құлағында ойнайтын шабандоз ару тұрады
Маңғыстау облысында ат жарысына ерлермен тең дәрежеде қатысып, жануардың күтімін бәрінен жақсы білетін 27 жастағы бойжеткен тұрады. Шабандоз Татьяна Макаркина уақытының көп бөлігін бәйгеге, ат бағуға арнайды. Ол тіпті жабайы, үйретілмеген атты дода жеңуге жігерлендіре біледі екен. Бұл туралы Stan.kz ақпарат агенттігі “Хабар24” порталына сілтеме жасап хабарлайды.
Татьяна Макаркина бала кезінен аты болғанын армандаған. 7 жасынан бастап облыстық, республикалық жарыстарға өзінің қыз бала екенін жасырып ұл ретінде қатысқан. Бүгінде оның қорасында 9 түрлі тұқымды жылқы бар.
“Бала кезімнен жылқыны жақсы көремін. Талай рет құлап, талай тұрып жатсам да аттан қорқу сезімі пайда болмады. Бізде қыздарды жарысқа мүлде жібермейтін. Сонда да мен кезінде Төлеген деген жалған атпен жарыстарға ұл боп шыққанмын. Өте кішкентай болдым, салмағым бар жоғы 30 келі болатын. Кейін есейіп, салмақ өзгерген соң қыз қуумен айналыса бастадым. Жылқы - менің хоббиім, олар мен үшін балаларым сияқты”, – деді Татьяна.
Тұлпарлар азығына ақшаны өздері табады. Олар фотосессияларға, атқа мінуге қатысып, клиптерге түседі. Бұл атқорада кеңестік ауыр жүк көлік, пони, ағылшынның асыл тұқымды жылқысы, әзірбайжан жылқысы, орел троттері, тіпті Қазақстан үшін өте сирек кездесетін голландиялық қара фриз бар.
Татьяна еңбектене жүріп, барлығына өз күшімен қол жеткізудің қандай екенін жақсы біледі. Себебі ол жасөспірім кезінде ата-анасынан айырылып, балалар үйіне түскен. Осыған қарамастан бойжеткен сүйікті ісін кәсіпке айналдыра алды. 10 жыл бұрын оның бір жылқысы болса, бүгінде олардың саны 9-ға жетті. Ал бойжеткеннің жылқыларының ең қымбаты 6 миллион теңгеге бағаланады.
Қазір бойжеткен жастарды жұмыспен қамтып отыр. Мәселен, солардың бірі Ангелина, бірнеше жылдан бері атқорада жұмыс істейді. Ол жылқылардың қатаң кесте бойынша тәртібін қадағалайды. Оның ең сүйікті тұлпары – Маңғыстау облысының облыс орталығының құрметіне арнап аталған 20 жастағы Ақтау.
“Мен таңғы 9-дан кешке дейін жұмыс істеймін. Жылқыларды тазалаймын, жуындырып, жем беремін. Тек сенбі және жексенбі күндері жұмыс істеймін. Себебі басқа күндері колледжде сабағым бар. Ақша тауып, өзіме жылқы сатып алсам ба деп ойлаймын. Маған Ақтау қатты ұнайды. Мен оны сатып алғым келеді”, – деді Ангелина Сухорукова.
Бүгінде Татьяна өз қорасын Ақалтеке жылқысымен толықтыруды қалайды. Одан бөлек, шабандоз ат қораның аумағын ұлғайтып, ипподром ашуды да жоспарлап отыр.