Әскери полигон Арыс қаласынан 60 шақырым қашықта жатыр. Шардараға қатынайтын күре жолдан солға бұрылып, 7-8 шақырым қара жолмен жүруге тура келеді. Таңертеңгі 9-дар шамасында полигонға снарядтар артқан 5-6 әскери жүк көлігі келе жатты. Оның соңынан тағы екі өрт сөндіру машинасы ілескен. Жай адамның онда жақын баруына болмайды. Өйткені, қауіпті аймақ. Бірақ, біз сонда да әлгі нысанға мейлінше жақындауға тырыстық.

Арыс қаласы аумағындағы әскери полигонның аймағы қаладан 60 шақырым қашықтықта орналасқан. Әскери бөлімнен шығарылған қауіпті заттар, яғни, снарядтың барлығы осы жерде залалсыздандырылады. Кешегі әскерилер де осы жерден жарақат алды. Қауіпті аймақ болғандықтан, мұнда кіруге мүмкіндік жоқ.

Аумағы атшаптырым жерді алып жатқан полигон екі сайдың дәл ортасына салынған. Мерзімі өткен жарылғыш заттарды осы жерде залалсыздандырады. Осы маңдағы қойшылардың сөзінше, күніне 6 снаряд жарады екен әскерилер. Оның үшеуін түске дейін, қалғаны кешқұрым жойылады. Тіпті, кей кезде оның саны артып кететін кездері де болады екен. Ал, жексенбі күні демалыс.

Әскери полигонның аймағында 2-3 қойшының үйі бар екен. Соның бірі - Бейсенбай Ербосыновтың шаңырағы. Шопанның сөзінше, жарылыс аумағында күніне бірнеше снаряд залалсыздандырылады. Жойқын жарылыстың дүмпуі 4 шақырым қашықтықта тұрған үйін дірілдетіп жіберетін көрінеді. Бірде болмаса бірде үйім опрылым ортасына түсіп кетеді ме деп те қауіптенеді. Сол үшін балаларын Байырқұм ауылындағы туысының үйіне жіберіпті.

"Кәдімгі "дыңң" етіп, жерді дірілдетеді. Үйдеген кәдімгі терезелер сықырлап кетеді. Терезе, жер сықырлайды. Енді қайтемін, қайда барамын? Бомба жарады деп қашып кетемін бе? Үйрендік қой", - дейді шопан Бейсенбай Ербосынов.

Сенбі күнгі жарылыстан зардап шеккен 10 сарбаздың барлығы келісім-шарт қызметкерлері екен. Олар сол күні Шымкент әуежайынан ұшақпен Алматыға жеткізілген. Алматыға әскери госпиталде ем қабылдап жатыр. Бірақ, туыстары алаңдаулы. Үш күннен бері жақындарының денсаулығы туралы ақпарат ала алмай отырғандарын айтады.

"Көрген кезде тек сыртынан көрдім, беті басын орап тастаған. Толық көрсеткен жоқ маған. Не болғанын білмеймін. Маған бір бес минут болады ғой көруге. Не дәрігер шықсын, бірімізді кіргізсін. Әйелін немесе әке-шешесін. Әке-шешесі ауылдан келіп тұр естіп. Ал, не жағдай болып жатқанын ешкім білмейді, ешкім айтпайды", - дейді жарақат алған әскери қызеткердің ағасы Еркін Жандарбеков.

Арыс полигонындағы оқыс оқиғаға қатысты Қорғаныс министрі Нұрлан Ермекбаев мәлімдеді. Үкімет сағатына келген министр жарақат алғандардың үшеуінің жағдайы тым ауыр екенін айтты. Жансақтау бөлімшесінде жатыр екен. Тағы біреуі орташа ауыр болса, қалған алтауының денсаулығы бірқалыпты көрінеді. Министр сондай-ақ, әскери бөлім аумағында әлі қанша оқ-дәрілер фрагменті бар екенін дөп айта алмады. Тіпті, кей сарапшылар оларды сол жерде жарып жіберу қажет деп кеңес айтқанын да жасырмады.

Ермекбаевтың айтуынша, қазір Арыстағы қару-жарақ қоймасында өте күрделі жұмыстары басталды. Осы жұмыстар барысында әскери бөлімшеден әлі де жарылатын, жарылмайтын қару түрлерінің фрагменттері табылып жатыр екен. "Дегенмен, жергілікті тұрғындарға, Арыс қаласына қауіп жоқ" дейді министр.

Талқылау