"Әнді қой, Instagram-парақшаңды өшір" деді": Әнші Назым Әбілдина сахнадан неге көрінбей кеткенін түсіндірді

Фото: Видеодан скриншот

КешYou тобының бұрынғы мүшесі, әнші Назым Әбілдина “Мамский әңгімеге” берген сұхбатында сахнадан жоғалуына күйеуі себепкер болғанын мәлімдеді. Бұл туралы Stan.kz ақпарат агенттігі хабарлайды.

Өнер иесі күйеуінің қатты қызғаншақ екенін бөлісіп, жолдасы өнерден кетіп, желідегі парақшаларды өшіруін сұрағанын айтты.

“Күйеуім қатты қызғаншақ. Шаңырақ көтергеннен кейін жолдасым “күйеуге шықтың, әнді де қой, Instagram-парақшаңды да өшіріп, үйде бол” деп айтты. Сөйтіп желідегі парақшаларды өшірдім, сахнадан да кеттім, артынан жүкті болып, екі жылдай өз әлемімде өмір сүрдім”, – деді ол.

Әнші тұрмысқа шықпай тұрып сүйіктісімен келісім болғанын жеткізді.

“Ол маған үйленуге ұсыныс жасаған кезде арамызда келісім болды. Мен оған өмір бойы сахнада жүргенімді, өнер менің өмірімнің бір бөлшегі екенін ашып айттым. Ол келісті, бірақ сахнаға бұрынғыдай жиі шықпайтынымды ескертті. Сөйтіп өнер жолында өзім үшін ғана жүремін деген келісімге келдік. Кейінірек үйленіп, ата-енемізбен тұра бастағанда, сахнадан кету туралы әңгімелер айтыла бастады. Күйеуім болғандықтан сөзіне қарсы шықпадым. Уақыт өте келе күйеуім мені түсініп, қазір өнерге қайта оралып жатырмын”, – деді ол.

Сондай-ақ Назым Әбілдина өзінің ажырасып кеткеніне қатысты қауесеттерге жауап берді.

“Әрбір отбасыда қиындықтар болады, бірақ біз ажырасқан жоқпыз”, – деді әнші.

Айта кетейік, Назым Әбілдина алғашында "Айгөлек" балалар байқауының жүргізушісі ретінде танылған еді. Ол "Лүпіл", KeshYou топтарының құрамында болды. Кейінгі кезде жеке әнші ретінде де өнер көрсетіп жүр.

Назым Әбілдина 2021 жылы неке жүзігін көрсетіп, тұрмысқа шығатынын хабарлаған еді. Ал әпкесі күйеу жігіттің жомарт, ер мінезді жан екенін, Байбосыновтар әулетінің көңілінен шыққанын айтты.

Өнер иесі бір жылдан кейін ұзатылып, ақ келін атанды. 2023 жылы алғаш рет ана атанды.