“Нақты нәтижелерді талап етемін”: Тоқаев министрлер мен әкімдерге батыл шешім қабылдауды тапсырды
Қасым-Жомарт Тоқаев EXPO қалашығында орналасқан Жобалық кеңсенің қызметімен танысып, бірқатар тапсырмалар берді. Бұл туралы Stan.kz ақпарат агенттігі хабарлайды.
Фото: Ақорда
Жобалармен танысқан Қасым-Жомарт Тоқаев еліміздің әлеуметтік-экономикалық дамуында айтарлықтай жетістікке жету үшін Үкімет мүшелері батыл шешім қабылдауы керек екенін атап өтті
"Алдымызда тұрған мақсаттар өте маңызды. Ең бастысы, Мемлекет басшысы берген тапсырмалардың орындалу барысын мұқият бақылауда ұстау қажет. Бұл орталықтың негізгі мақсаты – реформалардың тиімділігін арттыру. Президент әкімшілігі басшысының бірінші орынбасары Дархан Сатыбалды осы жұмысты қадағалайды. Министрлер де, әкімдер де батыл шешім қабылдауға дайын болуға тиіс. Мен осыған дейін Үкіметтің алдына нақты міндет қойдым. Еліміздің әлеуметтік-экономикалық дамуына қатысты мәселелер бойынша барынша дербес шешім қабылдануға тиіс. Нақты нәтижелерді талап етемін", – деді мемлекет басшысы.
Президент министрлер мен басшыларды бірқатар міндеттерді назарда ұстауға шақырды.
"Біз қазір ірі инфрақұрылымдық жобаларға, цифрландыруға, жасанды интеллект пен ядролық энергетикаға баса мән беріп жатырмыз. Себебі мұның бәрі – мемлекетіміздің негізгі стратегиялық даму бағыттары. Үкімет осы маңызды мәселелерді жұмыс барысында міндетті түрде ескеруге тиіс", – деді Президент.
Қасым-Жомарт Тоқаев атом энергетикасын дамыту перспективасына да тоқталды.
Еске салсақ, Тоқаев президент әкімшілігі басшысының орынбасары лауазымын не үшін қайта енгізгенін түсіндірген еді.