“Мисс Қазақстан-2016” байқауы қатысушыларының ресми суреттері жарияланды (фото)

Қазақстанның әр аймағында ең сұлу деп танылған арулар елордаға келіп жетті. Қазіргі таңда олар «Мисс Қазақстан-2016» байқауының ақтық сынына қызу дайындық үстінде. Бойжеткендер танымал фотограф Марета Келиговамен бірге ресми фотосессия жасады.

Байқаудың сайтында 25 қатысушының ресми суреттері жарияланды. Фотосессиядан бөлек, сұлулар түрлі әлеуметтік және қайырымдылық шараларына қатысты.

“Мисс Қазақстан-2016” байқауының жеңімпазы Астанадағы Бейбітшілік және келісім сарайында 10 желтоқсан күні анықталатын болады. “Мисс Қазақстан” ресми сайтында бүкіл халықтық дауыс беру 30 қарашада басталып кеткен болатын. Дауыс беру ақтық кезеңге дейін жалғаса береді. Онлайн-дауыстар sms арқылы жолданған дауыстарға қосылатын болады. Дауыс беруден және билет сатылымынан түскен қаражаттың бәрі Астананың тұрмыстық жағдайы төмен отбасыларына беріледі.

Ақтық кезеңде әділ-қазылар алқасы бар-жоғы бес аруға таңдау жасайды, ал еліміздегі ең сұлу аруды әдеттегідей қазақстандықтардың өздері таңдайды. Жеңімпаз бес миллион көлемінде ақшалай сыйлыққа ие болып, еліміздің атынан “Әлем аруы” байқауына қатысуға мүмкіндік алады.

Назарларыңызға 25 қатысушының ресми суреттерін ұсынамыз:

Кәмиля Әсілова. 18 жастағы сұлу Алматы қаласының атынан қатысады. Жүсіпбек Елебеков атындағы эстрада-цирк колледжінде “хореограф” мамандығы бойынша білім алған. “Маған өмір мен сұлулықты тарту еткен ата-анама алғысым шексіз”, – дейді бойжеткен.

Гүлжан Дәулетова. 19 жастағы ару “Алматы менеджмент университетінің студенті. Латынамерикалық бимен, йогамен айналысады.  Бүгінде бірнеше тілді қатар меңгерген. “I2mar” тобының әншісі.

 

Далида Наукенова. 24 жастағы бойжеткен Алматы қаласының намысын қорғайды. Мамандығы бойынша қаржыгер. Самбо спортынан Қазақстанның күміс жүлде иегері. Дастан Оразбеков жетекшілік ететін Turkiss тобының әншісі. Ол 2014 жылы өткен “Қазақ аруы – 2014” байқауында Павлодар қаласының намысын қорғаған болатын.

Елназ Нұрсейітова. 18 жастағы ару “Мисс Астана – 2016” байқауының жеңімпазы. Технология және бизнес университетінің студенті. Баскетбол, волейбол, армрестлинг сынды бірнеше спорт түрімен шұғылданады.

Екатерина Подгородецкая. “Мисс Астана – 2016” байқауының екінші орын иеленушісі. Экономика, қаржы және халықаралық сауда қазақ университетінің студенті. Домбыра шертіп, бос уақытында вокалмен айналысады.

Бекайым Жорабекова. “Мисс Астана – 2016” байқауының “Бірінші вице-мисс” аталымының жеңімпазы. 21 жастағы бойжеткен Литва университеттерінің бірінде білім алып жатыр. “Айару” тобының әншісі.

Мария Пятина. 17 жастағы ару Қарағанды қаласының атынан қатысады. Сурет өнері мектебін тәмамдаған. Бос уақытында бимен айналысады.

Айтгүл Нұрманова. 19 жастағы ару Қостанай қаласының тумасы. ЕҰУ-де халықаралық қатынастар факультетінде білім алып жатыр. Бүгінде бірнеше тілді жетік меңгерген.

Екатерина Цыганова. 24 жастағы Катя “Мисс Петропавл – 2016” байқауының жеңімпазы. Графикалық дизайн саласында білім алған. Қару-жарақ ұстап, атқа мінгенді ұнатады.

Данара Бекмырзаева. 16 жастағы қатысушы Семей қаласының намысын қорғайды. Мұқан Төлебаев атындағы музыка училищесінде білім алып жатыр. Спорттың бірнеше түрімен және бимен шұғылданады.

Анастасия Усольцева. 18 жастағы қыз “Мисс Өскемен – 2016” байқауының жеңімпазы. Шығыс техникалық-гуманитарлық колледжде білім алып жатыр. Бос уақытында сурет салып, гимнастикамен айналысқанды ұнатады.

Айнұр Шаймарданова. 18 жастағы ару “Мисс Орал – 2016” байқауының жеңімпазы. ШҚО Жәңгір хан атындағы аграрлық-техникалық университеттің студенті. Ұлттық бимен және спортпен шұғылданады.

Кристиана Шлиммер. 17 жастағы ару Қостанай қаласының намысын қорғайды. Құрылыс колледжінде архитектура бөлімінде білім алып жатыр. Қайырымдылықпен айналысқанды ұнатады.

Айзат Қожабаева. 21 жастағы ару Павлодар қаласының атынан қатысады. Сұлтан Торайғыров атындағы университетте білім алған. Облыстық телеарнада жұмыс істейді. Таңертеңгілік бағдарламаны жүргізеді.

Гүлбану Әзімханова. 18 жастағы ару “Мисс Қызылорда – 2016” байқауының жеңімпазы. Болашақ медицина саласының маманы.

Зарина Загидуллина. 20 жастағы бойжеткен Түркістан қаласының намысын қорғайды. Қазан қаласында қаржы саласы бойынша білім алып жатыр. 2016 жылдың қыркүйек айында Батумиде өткен “Miss and Mister Planet 2016” байқауында Қазақстанның намысын қорғаған болатын. Аталған байқауда “Мисс Планета Грация – 2016” аталымын жеңіп алды.

Қымбат Бертай. 21 жастағы ару “Мисс Тараз – 2016” байқауының жеңімпазы. Тараз мемлекеттік педагогика институтында “физика” мамандығы бойынша білім алып жатыр. “Адамдарға мейірімділігіңді сыйлаудан артық бақыт жоқ шығар”, – дейді ол.

Тоғжан Бекжігіт. 20 жастағы сұлу “Мисс Шымкент – 2016” байқауының жеңімпазы. Мұхтар Әуезов атындағы Оңтүстік Қазақстан мемлекеттік университетінің студенті. Бүгіні таңда аталған ЖОО-да жеңіл өнеркәсіп саласы бойынша білім алып жатыр.

Аруна Сағатбекова. 16 жастағы бойжеткен Талдықорған қаласының намысын қорғайды. №5 мектеп-лицейде білім алып жатыр. Бұған дейін музыка мектебін тәмамдаған. Бос уақытында ән салып, фортепианода ойнағанды ұнатады.

Дания Күләрқанова. 17 жастағы ару Ақтөбе қаласының намысын қорғайды. Ол әзірге №11 гимназияда білім алып жатыр. Жүзуді, шаңғымен сырғанағанды және атқа мінгенді ұнатады.

Ақкүміс Елемесова. 21 жастағы қыз “Мисс Атырау – 2016” байқауының жеңімпазы. Хәлел Досмұхамедов атындағы Атырау мемлекеттік университетінің студенті. Қобыз аспабын жетік меңгерген.

Балқия Сазанова. 18 жаста. “Мисс – Ақтау – 2016” байқауының жеңімпазы. “Мейірбике” колледжінің студенті. Домбыра мен фортепианода ойнайды.

Айман Назенғалиева. 18 жастағы бойжеткен “Мисс Instagram” байқауының финалисі. Атыраудағы Дүтбаев атындағы гуманитарлық колледжінің студенті. Өлең шығарады.

Сандина Биссен. 20 жастағы ару “Мисс Instagram” байқауының жеңімпазы. Алматы қаласындағы әл-Фараби атындағы қазақ ұлттық университетінің студенті. Журналистика факультетінде білім алып жатқан бойжеткен ән айтып, би билейді.

Жанзира Кәрібаева. 21 жастағы бұл бойжеткен де “Мисс Instagram” байқауының финалисі. Құрманғазы атындағы қазақ ұлттық консерваториясының студенті. “Халық музыкасы” факультетінде оқиды. Домбыра, жетіген, саз сырнай сынды бірнеше аспапты жетік меңгерген.

Жіберіп алмаңыз:

Гүлнұр Оразымбетова өзін “отбасын бұзған әйел” дегендерге жауап берді

Елбасы Тасмағамбетов пен “Мәңгілік ел” монументінің өзге авторларына сыйақы тағайындады

Қайрат Нұртастың бір күнде қанша табыс табатынын білесіз бе?

Бір-біріне ұқсай ма: қазақстандық жұлдыздар мен олардың туған бауырлары