Миллионды қолды қылған: Алматы облысының тұрғыны полиция қызметкерлерін ұрлық жасады деп айыптады

Алматы облысындағы бұзақылық жасады деп айыпталған күдіктінің туыстары полиция қызметкерлерін аса ірі көлемде ақша жымқырды деп айыптады. Есік қаласының тұрғыны бір ай бұрын қолға түскен. Ер адам көлікті сатуға қойған. Алайда ол әділ келісім жасаудың орнына, сатып алушының 10 миллион теңгесін тартып алған. "Міне тек осы заттай дәлелдер жоғалып кетті",  – дейді күдіктінің туыстары. Күдіктінің туыстары бұған полицияны кінәлап, оларды жазалауды сұрайды, деп хабарлайды Stan.kz ақпарат агенттігі Астана арнасына сілтеме жасап.

Қылмыстық оқиға осыдан бір ай бұрын Есік қаласында болған. Жергілікті тұрғын көлігін сатуға қояды. Ал көлік өзінікі емес жалға алынған болып шығады. Көлікті алуға келген сатып алушыға ер жігіт бірнеше пышақпен жарақаттап, 10 миллион теңгесін тартып алады. Күдіктіні бірден қолға түсірген. Бірақ полиция қызметкерлері бұл соманың тек жарты миллион теңгесін ғана іс материалдарына қосады. "Қалған ақшалар із түссіз жоғалып кеткен", - дейді күдіктінің анасы.

"Ұлымды қолға түсірген жедел әрекет ету қызметкерлері ғана баламның қайда екенін білген. Ал бөлменің картасы мен кілттерін тұтқындау кезінде алып кеткен. Мен өз баламды ақтамаймын. Мен тек қолды болған ақшалар табылсын деймін. Себебі мен оны жәбірленушіге қайтарып беруге тиістімін ғой", - дейді анасы Жанар Мұқышева.

Туыстары дәлел ретінде қонақүйдегі бейнебақылау камераларынан түсірілген бейнежазбаларды көрсетеді. Жазбадан азаматтық киім киген ер адамның бөлмеге кіріп кеткенін көруге болады. Тек осыдан кейін ғана күдіктімен бірге тәртіп сақшылары келеді. Алайда соманың толық мөлшері бөлмеде болмай шықты.

• "Шотындағы ақшаны өздеріне аударып алған": Семей тұрғыны полиция қызметкерлерін марқұм күйеуін тонады деп айыптады


• "Қолым кісендеулі жатқанда есімді жидым": Алматыда полиция қызметкерлері Өзбекстаннан келген этникалық қазақты аяусыз тепкілеген


• "Естігенде аң-таң болды": Шығыс Қазақстан тұрғыны екі ай бойы тоналып жүргенін білмеген

"Есікті смарт-карта арқылы ашып, ішке емін-еркін кіріп, 15 минуттан кейін қайта шығады. Яғни, бұл фактілердің барлығы ақшаны үшінші адамның қолды қылғанын аңғартады. Қонақ үй әкімшілігі бір ғана смарт-картаның болатынын айтады. Осы жағдайлар бізге ақшаны ұрлауға полиция қызметкерлерінің қатысы болуы мүмкін деуге негіз береді", – дейді күдіктінің заңгері Рүстем Гаитов.

Қолға түскен азаматтың туыстары полицейлерді ақшамен қоса су жаңа ұялы телефонды қоса қолды қылды деп отыр. Полицияда бұл пікірге тергеу амалдары жүргізіліп жатыр деп жауап берді.

"Айтылған шағымдар мен фактілер бойынша ПД-ның ішкі қауіпсіздік басқармасы ҚР ҚК 188-бабы (ұрлық) бойынша қылмыстық іс қозғады, тергеу амалдары жүргізілуде", – деді Алматы облыстық полиция департаменті.

Тонау және ірі көлемдегі ақшаны ұрлағаны үшін 21 жастағы алматылық он бес жылға бас бостандығынан айырылуы мүмкін. Күдіктінің отбасы ұрланған ақша табылады деп үміттенеді. Бұл жазаны біршама жеңілдетуге әсер етеді. Туыстары тәртіп сақшыларын жауапқа тарту үшін Бас прокуратураға шағымдануға ниет білдіріп отыр.