"Мені тыңдаңыздар, біз бірге болуымыз керек": Шөкеев Шымкентте наразы халықпен кездесті
Түркістан облысы әкімі Өмірзақ Шөкеев Шымкент қаласында бір көшені тұтастай жауып алған Арыс тұрғындарымен кездесті, деп хабарлайды Stan.kz ақпарат агенттігі.
Әкім, алдымен, «Ақмешіт» мешітінің алдына жиналған халықтың талап-тілегін тыңдады. Арыс тұрғындары өз кезегінде радиация туралы сыбыстар естігенін айтып, басқа қалаларға көшіруді сұрады.
«Іріткі салатындардың сөзіне құлақ аспаңыздар. Мені тыңдаңыздар. Біз бірге болуымыз керек. Арыста ешқандай радиация жоқ. Сіздерге Арыста үй салып береді. Кейін оны сату-сатпауды өздеріңіз шешесіздер», - деді Өмірзақ Шөкеев.
Мұның алдында Шымкент әкімі Ғабидолла Әбдірахымов жиналған қауыммен сөйлесіп, кезекте тұрған отбасылардың бәріне бірдей үй беру мүмкін емес екенін айтты.
«Сіздер Шымкенттен үй беруді талап етіп жатырсыздар. Мүгедектер мен табысы төмен азаматтар – 130 мың адам кезекте тұр. Мен оларға бірнәрсе айтуым керек пе? «Мен сіздерге үй бермеймін, орнына Арыс тұрғындарына беремін» деуім керек пе? Олар да адам. Арыс – бұл жақсы қала мен станция. Экономика дамитын болады. Ертеңнің өзінде ол жақта ешқандай әскери заттар болмайды. Жаңа үйлер мен жол салады», - деді ол наразы халыққа.
Естеріңізге сала кетсек, осы уақытқа дейін Арыс қаласы тұрғындарының Шымкенттегі мешіт алдындағы көшені жауып алғаны туралы хабарлаған едік.