"Мені тек мазаламаңдаршы": Мақпал Жүнісова Президент Іс басқармасының емханасына ренішін білдірді

Қазақстанның халық әртісі Мақпал Жүнісова ҚР Президенті Іс басқармасы Медициналық орталығының Ұлттық госпиталінен өзін тіркеуден шығару туралы хабарлама келгенін айтып, медициналық мекеме қызметкерлерінің қайта-қайта тексеруден өтуге шақыратынына ренішін жеткізді. Бұл туралы Stan.kz ақпарат агенттігі хабарлайды.

Өнер иесінің айтуынша, халық әртістері мен еңбек сіңірген қайраткерлер Президент Іс басқармасына қарасты медициналық мекемеде тіркеуде тұрады. Мақпал Жүнісова бұл емханаға 1994 жылдан бері тіркелгенін айтты.

Әнші осы уақыт ішінде өзіне тиесілі кейбір медициналық мүмкіндіктерден бейхабар болғанын да жасырмады. Соның бірі – жыл сайын санаторийге тегін жолдама алу мүмкіндігі.

“Біз халық әртістері, еңбек сіңірген қайраткерлері “совминде” тіркеуде тұрмыз. Сол жаққа барып, анализ тапсырып тұрамыз. Сол “совминде” бір ереже бар екен, мен оны былтыр ғана естіп, таңғалдым. Мен 1994 жылдан бері тіркеудемін, жыл сайын санаторийге жолдама береді екен, тегін. Біз баруымыз керек екен. Мен өмірімде мұндай дүниелерді пайдаланып көрмеген адаммын. Оны естігенде де таңғалып, “Маған неге айтпаған, жыл сайын санаторийге баруға болады екен ғой” деп қалдым”, – деді ол.

Оқыңыз

"Екі буынның тоғысуы": Мақпал Жүнісова мен Тұрар Ыдырыстың дуэті елді таңғалдырды Оқыңыз

Мақпал Жүнісова қазір медициналық тексерулерді үйіне жақын орналасқан клиникаларда тапсыратынын жеткізді. Сондай-ақ шетелге барып, Корея мен Түркияда да денсаулығын тексертіп тұратынын айтты.

“Енді қазір менің үйімнің жанында клиника көп. Жақын үйіме барып, анализ тапсырып, чекап өтемін. Кореяға да, Түркияға да барып, тексеріліп жатырмыз. Деніміз сау, шауып жүрміз, күнде жұмыс, гастроль бар, концерт бар”, – деді әнші.

Оның сөзінше, Президент Іс басқармасына қарасты емхананың қызметкерлері медициналық тексеруден өту қажеттігін ескертіп, оған жиі хабарласады. Алайда әнші денсаулығына шағымы жоқ екенін айтып, мұндай қоңыраулардан шаршағанын жеткізген.

“Совминнің” қыздары қайта-қайта хабарласып, анализ тапсырыңыз, тексеру керек деп қоймайды. Мен “Қыздар, денім сау, Аллаға шүкір, бәрі дұрыс” десем, “Онда, келмесеңіз, “совминнің” тіркеуінен шығарамыз” дейді. Шығара беріңдер дедім. Менің жабысып қалған ешнәрсем жоқ. Үйімнің жанында клиника бар, ауырып қалсам Медеу ауданы бойынша клиникаға барамын”, – деді ол.

Әншінің айтуынша, кейін Астанадан өзін тіркеуден шығару туралы тағы бір ресми хат келген. Ол бұған қарсы емес екенін айтып, орнына басқа адамды тіркесе де ренжімейтінін жеткізді.

“Енді тағы да Астанадан хат келді. Шығарамыз дейді. Шығара беріңдерші. Кім екен оны жіберіп отырған? Маған қарап қалыпты ма? Менің орныма біреуді кіргізгісі келіп тұрса, кіргізе берсін. Ренжімеймін. Мені тек мазаламаңдаршы”, – деді Мақпал Жүнісова.

Еске салайық, бұған дейін Мақпал Жүнісова 55 миллион теңге жұмсаған жөндеу жұмысына наразы болғаны хабарланған еді.