"КСРО-дан сүйреп әкелген сияқты": LRT вагоны астаналықтар арасында қызу талқыға түсті (видео)
Әлеуметтік желіде Астана көшелерінде “қызыл вагон" түсірілген видео тарады. Желі қолданушылары мұны елордаға әкелінген ескі, пайдаланылған LRT көлігі деп жатыр. Бұл туралы Stan.kz ақпарат агенттігі хабарлайды.
Коллаж Stan.kz
Бұрынғы кеңестік дәуірдегідей тозығы жеткен қызыл "вагон" қала тұрғындары арасында қызу талқыға түсті.
"Вагонды КСРО-дан сүйреп әкелген сияқты. Қандай сұмдық!”, "Бұл балаларға арналған ба? Іске қосылған кезде көлемі үлкейеді. Тек оған мемлекет бюджетін құю керек”, “Бұл жол төсеуге арналған вагон. Болашақта LRT-да басқа машиналар қосылады”, ”Өрт сөндіру пойызын іске қосқан ба”, – деп жазды олар.
Алайда City Transportation Systems көлік қызметі мұның вагон емес екенін түсіндірді.
"Бұл LRT жолының құрылысына арналған маневрлік тартқыш. Ешқандай “кеңестік” вагондар сатып алынған жоқ", – деп жауап берді қызмет.
Айта кетейік, бұған дейін Интерпол іздеуде жүрген "Астана LRT" экс-басшысы Талғат Арданның қайда екені жайлы ақпарат ұсынбағаны туралы жазған едік.