"Казцинк" спортты дамытуға миллиард теңгеден астам қаржы бөлмек
Еліміздегі ірі кен металлургия компанияларының бірі спортты дамытуға және қазақстандық атлеттердің жарыстарға қатысуына 1,25 миллиард теңге бөледі. Тиісті құжатқа "Казцинк" ЖШС басшылығы мен Қазақстанның Ұлттық олимпиадалық комитеті арасында қол қойылды.
“Дене шынықтыру мен спортты дамыту біздің компанияның әлеуметтік саясатының ажырамас бөлігі болып табылады. Біз спорттық бастамаларды, балалар мен жасөспірімдердің спорт мектептерін белсенді қолдаймыз, сондықтан Қазақстанның олимпиадалық қозғалысына да көмектесуге қуаныштымыз. Бұл отандық атлеттердің дамуына қуатты серпін беретініне сенімдімін”, - дейді "Казцинк" ЖШС бас директоры Жанат Жанбат.
Компания бөлген қаражатты басымды олимпиадалық пәндерді де, болашақта әлеуеті бар спорт түрлерін де қамтитын бейінді федерацияларға бағыттау жоспарлануда.
“Олимпиадалық қозғалыстың құндылықтарын бөлісетін сенімді мықты серіктестерсіз спортты дамыту мүмкін емес. Спортты қолдауға қосқан үлесі үшін "Казцинкке" алғыс білдіреміз. Біздің ынтымақтастығымыз ортақ мақсаттарға қол жеткізуге бағытталған тиімді серіктестіктің үлгісі болатынына сенімдімін”, – деді Қазақстан ҰОК президенті Геннадий Головкин.
Серіктестік материал
Талқылау