Қазақстанда жекеменшік мектептерге қойылатын талаптар күшейтіледі

Фото: Оқу-ағарту министрлігі

Қазақстанда субсидияларды жымқыру фактілерінен кейін жеке мектептерге қойылатын талаптар күшейтіледі. Оқу-ағарту министрлігі енді жеке мектептерге лицензияны орындар жетіспейтін өңірлерде ғана береді. Бұл туралы Stan.kz ақпарат агенттігі хабарлайды.

Оқу-ағарту министрі Жұлдыз Сүлейменова болашақта жеке мектептер нақты қажеттілік бар өңірлерде ғана ашылатынын айтты. Лицензиялар тек үш ауысымды мектептерді, апатты жағдайдағы мектептерді алмастыру қажет болған жағдайда және мемлекеттік мектептері жетіспейтін өңірлерде беріледі.

Сондай-ақ заңнама аясында жеке мектептердің құрылтайшыларына қойылатын талаптар да күшейтіледі.

“Олар білім сапасы, мұғалімдердің біліктілік деңгейі және оқушылардың қауіпсіздігі үшін жауапты болады. Сондай-ақ мектеп директорларын тағайындау тәртібін өзгерту жоспарланып отыр. Болашақта тағайындау туралы шешімдер құрылтайшылардың қарауына ғана емес, салалық министрлік пен жергілікті атқарушы органдардың келісімі ескеріле отырып қабылданады”, – деп мәлімдеді министрлік.

• Қазақстанда мұғалімдер жаңа аттестация талабының салдарынан сыйақыларынан айырылды
• Алматыда жекеменшік мектепте мұғалімдер жаппай жұмыстан кетті, ал балалар білім алу мүмкіндігінен айырылды

Ведомство мәліметінше, қазір Қазақстанда лицензиясы бар 890 жеке меншік мектеп жұмыс істейді. Үкімет жаңа ашылатын жеке мектептерде мемлекеттік тапсырыс орналастыруға мораторий енгізуді жоспарлап отыр.