Қазақстанда жалға берілетін самокаттарға нөмір қойылып, оларды сақтандыру міндетті болады

Фото: freepik.com

Мәжіліс депутаты Екатерина Смышляева электросамокаттарға енгізілген жаңа ережелер туралы айтты. Ереже бойынша, Қазақстанда жалға берілетін самокаттарға нөмір қойылады және міндетті сақтандыру енгізіледі. Бұл туралы Stan.kz ақпарат агенттігі хабарлайды. 

Депутаттың айтуынша, алғашқы ережелер шамамен бір жарым жыл бұрын енгізілген. Сол кезде самокатпен жолға шығу үшін жүргізуші 18 жастан асқан болуы, кез келген санаттағы жүргізуші куәлігі, каска және жарық шағылдыратын элементтер болуы талап етілді. Жаяу жүргіншілер тротуарында самокатпен жүргендер самокаттан түсіп жүруі, немесе "жаяу жүргіншілер режимінде" жүруі тиіс болды.

Смышляева атап өткендей, самокаттарды жалға беретін компаниялар тротуардағы самокаттардың жылдамдығын шектеуге уәде берген. Бірақ бұл міндеттер толық орындалмаған және заң бұзушылықтар әлі де кездеседі.

Депутаттың айтуынша, әріптестері жаңа талаптарды қолдаған. Ең басты жаңалықтардың бірі – жалға алынатын самокаттарға көрінетін тіркеу нөмірлерін енгізу. Бұл нөмірлер қаланың видеобақылау жүйесіне ережелерді бұзғандарды тіркеуге және нақты пайдаланушыны анықтауға мүмкіндік береді. Сонымен қатар, жалға берілетін самокаттар үшін міндетті сақтандыру енгізіледі. Өйткені олар жол-көлік оқиғаларына жиі қатысады. Сақтандыру пайдаланушының жауапкершілігін жабуы керек. Себебі самокат оның жеке мүлкі емес.

• Түркістан облысында 20 жылдан бері жол ережесін бұзбаған жүргізуші марапатталды

• Қазақстанда полицейлерге жол жиегінде көлікті ала таяқпен тоқтатуға қайта рұқсат беріледі

Смышляева тротуарларда самокатпен жүруді тыйу ұсынысын да қарастырып жатқанын айтты. Депутат самокатшыларды жолға шығуға мәжбүрлемейтінін де жеткізді.

"Жолда қатал талаптар бар: 18+, куәлік, каска және жарық шағылдыратын элементтер. Бүгін тротуарда жүргендердің көбісі жолға шыға алмайды", – деді ол. 

Смышляева самокат және велосипед жолдарын дамыту қажет екенін мойындады. Бұл мәселені бірнеше рет көтергенін еске салды. Бірақ құрылыс баяу жүріп жатыр.  Депутат ережелерді бұзған самокатшылар жауапқа тартылатынын да еске салды.