Бұл туралы энергетика вице-министрі Әлібек Жамауов халықаралық "Energy Trends: Gas & Petrochemicals" конференциясында мәлімдеді.
Вице-министр алдағы жылдары елімізде төрт жаңа газ өңдеу зауыты салынатынын атап өтті. Сонымен қатар магистральды газ құбырлары модернизацияланып, өңірлерді газдандыру жұмыстары жалғасады.
Жамауовтың айтуынша, 2025 жылға дейін газ өндіру көлемі 62,8 миллиард текше метрге жетеді. Ал 2030 жылға қарай бұл көрсеткіш 74 миллиард текше метрге шығады деген жоспар бар. Қазіргі уақытта Теңіз, Қашаған, Қарашығанақ сияқты ескі алыптармен қатар, Рожков, Анабай, Өріктау сияқты жаңа кен орындары да жұмыс істеп жатыр.
Инвесторлардың қызығушылығы төмендеген: Қазақстанның мұнай қоры алдағы 10 жылда таусылмақ
Қазақстан алғашқы АЭС құрылысына Ресей қатысады деп үміттенеді
Жаңа зауыттар:
- Қашаған кен орнында жылына 1 және 2,5 миллиард текше метр қуаттылығымен екі зауыт салынады;
- Қарашығанақ кен орнында жылына 4 миллиард текше метр қуаттылығымен газ өңдеу зауыты;
- Жаңаөзенде ашылатын жаңа газ өңдеу зауыты жылына 900 миллион текше метр қуаттылыққа ие болады.
Жақын арада энергетика министрлігі 2025-2029 жылдарға арналған газ саласын дамыту бойынша кешенді жоспарды бекітпек. Министрлік 2029 жылдың соңына дейін газ саласына 25 миллиардтан астам доллар инвестиция тартуды жоспарлап отыр.
Еске салсақ, бұған дейін энергетика министрлігі Атырау мұнай өңдеу зауытының ресейлік компанияға сатылатыны туралы ақпаратқа қатысты мәлімдеме жасаған еді.
